शिरपूर (प्रतिनिधी): शिरपूर शहरातील ग्रामदैवत श्री खंडेराव महाराज मंदिर यात्रोत्सवात खेळण्यांची दुकाने लावण्याच्या कारणावरून दोन गटांत तुफान हाणामारी होऊन यात्रेच्या आनंदावर विरजण पडले. गुरुवारी (ता. ५) सायंकाळी खंडोबा मंदिराशेजारील मच्छीबाजार परिसरात घडलेल्या या खळबळजनक घटनेत कु-हाड, तलवार व लाकडी काठ्यांचा वापर झाल्याने अनेक जण जखमी झाले. प्रकरणी दोन्ही गटांच्या तक्रारीनुसार एकूण १८ जणांविरुद्ध गंभीर स्वरूपाचे गुन्हे दाखल करण्यात आले आहेत.
पोलीस सूत्रांनी दिलेल्या माहितीनुसार, दरवर्षीप्रमाणे यंदाही यात्रेनिमित्त मच्छीबाजार परिसरात खेळण्यांची दुकाने लावण्यात आली होती. दुकानाच्या जागेवरून सुरू झालेला वाद काही क्षणांतच चिघळला आणि हाणामारीत रूपांतरित झाला. एका गटाने कु-हाड घेऊन केलेल्या हल्ल्यात प्रदीप मनोज भिल यांच्या डोक्याला गंभीर दुखापत झाली. तर दुसऱ्या बाजूने काठ्यांनी केलेल्या मारहाणीत हात, पाय व पाठीवर जखमा झाल्या. भांडणादरम्यान आरोपींनी हातात शस्त्रे घेऊन परिसरातील दुकाने बळजबरीने बंद पाडत दहशत निर्माण केल्याचा आरोप तक्रारीत करण्यात आला आहे.
दरम्यान, दुसऱ्या गटाकडून दाखल करण्यात आलेल्या तक्रारीतही परस्परविरोधी आरोप करण्यात आले आहेत. आपल्यावर कु-हाड, तलवार व लाकडी दांडक्यांनी प्राणघातक हल्ला झाल्याचे नमूद करण्यात आले आहे. या हल्ल्यात रविंद्र आधार सोनवणे यांच्या डोक्याला गंभीर दुखापत झाली असून त्यांच्यावर शिरपूर येथील कॉटेज हॉस्पिटलमध्ये उपचार सुरू आहेत. इतर जखमींनाही उपचारासाठी दाखल करण्यात आले आहे.
घटनेची माहिती मिळताच पोलिसांनी तत्काळ घटनास्थळी धाव घेत परिस्थिती नियंत्रणात आणली. दंगल, जीवे ठार मारण्याचा प्रयत्न, बेकायदेशीर जमाव, शस्त्रांचा वापर व सार्वजनिक ठिकाणी दहशत निर्माण करणे आदी विविध कलमान्वये दोन्ही गटांतील १८ आरोपींविरुद्ध गुन्हे दाखल करण्यात आले आहेत. पुढील तपास पीएसआय संदीप दरवडे व पीएसआय कुशारे करीत आहेत.
या घटनेमुळे यात्रोत्सवाच्या काळात परिसरात भीतीचे वातावरण पसरले असून, कायदा-सुव्यवस्था अबाधित ठेवण्यासाठी मच्छीबाजार व मंदिर परिसरात अतिरिक्त पोलीस बंदोबस्त तैनात करण्यात आला आहे. यात्रेतील भाविकांच्या सुरक्षिततेसाठी पोलिसांकडून सतर्कता वाढविण्यात आली आहे.
मुख्य संपादक – गणेश दगा पाटील.
