शिरपूर शहरात भेसळयुक्त दुधाची विक्री केली जात असल्याचा धक्कादायक प्रकार समोर आला आहे. या भेसळयुक्त दुधाचा उकळल्यावर रबरासारखा आकार तयार झाल्याचा व्हिडीओ सोशल मीडियावर व्हायरल झाला असून, नागरिकांमध्ये मोठी खळबळ उडाली आहे.
मिळालेल्या माहितीनुसार, शिरपूर शहरातील एका दुकानातून एका महिलेनं दूध खरेदी केलं. काही तासांनंतर दूध खराब झाल्याचं लक्षात आल्यानं तिनं ते उकळून पाहिलं. मात्र, उकळल्यानंतर दूध जाड, चिकट आणि रबरासारखं बनलं. महिलेनं तत्काळ याचा व्हिडीओ काढून सोशल मीडियावर शेअर केला. हा व्हिडीओ व्हायरल झाल्यानंतर स्थानिक नागरिकांमध्ये संतापाची लाट उसळली आहे.
दरम्यान, सणासुदीच्या काळात दूध विक्रीत मोठी वाढ होते. अशा काळात भेसळयुक्त दूध विक्रीचा प्रकार उघड झाल्यानं दूध विक्रेत्यांवर संशयाचे सावट पसरले आहे. नागरिकांनी संबंधित दुकानदारावर कठोर कारवाईची मागणी केली आहे.
या प्रकरणाची दखल घेत अन्न व औषध प्रशासनाने (FDA) चौकशी सुरू केली आहे. अन्न व औषध प्रशासनाचे अधिकारी किशोर बाविस्कर यांनी सांगितले की, संबंधित दूध विक्री केंद्राकडून नमुने घेतले जाणार असून ते तपासणीसाठी प्रयोगशाळेत पाठवले जातील. तपास अहवाल आल्यानंतर दोषींवर कठोर कारवाई केली जाईल, असे त्यांनी स्पष्ट केले.
भेसळ करून नफा मिळवण्यासाठी काही व्यापारी दूधामध्ये रासायनिक घटक किंवा पावडर मिसळत असल्याचा प्राथमिक संशय व्यक्त केला जात आहे. या घटनेनंतर नागरिकांच्या मनात मात्र एकच प्रश्न निर्माण झाला आहे — आपण रोज पितो ते दूध खरंच शुद्ध आहे का?
मुख्य संपादक – गणेश दगा पाटील.
