शिरपूर (प्रतिनिधी) – धुळे जिल्ह्यातील शिरपूर तालुक्यात पुन्हा एकदा भेसळयुक्त दुधाचा धक्कादायक प्रकार समोर आला असून या घटनेमुळे नागरिकांमध्ये भीतीचे वातावरण निर्माण झाले आहे. दुध उकळल्यानंतर ते रबरसारख्या गोळ्यात रूपांतरित झाल्याचा प्रकार उघड झाल्याने दुधाच्या गुणवत्तेबाबत गंभीर प्रश्नचिन्ह निर्माण झाले आहे.
मिळालेल्या माहितीनुसार, शिरपूर तालुक्यातील खर्दे येथील रहिवासी आशाबाई बोरसे यांनी नेहमीप्रमाणे रात्री दूधवाल्याकडून अर्धा लिटर दूध खरेदी केले होते. मात्र हे दूध गरम करताच त्यामध्ये आश्चर्यकारक बदल दिसून आला. उकळल्यानंतर संपूर्ण दूध रबरसारख्या घट्ट गोळ्यात बदलले. हा गोळा हाताने तुटत असून त्याचा पोत पूर्णपणे कृत्रिम असल्याचे दिसून आले.
हा प्रकार पाहून आशाबाई बोरसे यांना मोठा धक्का बसला. विशेष म्हणजे त्या नेहमी त्याच दूध विक्रेत्याकडून दूध घेत असल्याने असा प्रकार पहिल्यांदाच घडल्याचे त्यांनी सांगितले. या घटनेमुळे परिसरातील नागरिकांमध्ये दुधाच्या शुद्धतेबाबत गंभीर शंका निर्माण झाली आहे.
अन्न व औषध प्रशासनाची तातडीची कारवाई
या प्रकरणाची माहिती मिळताच अन्न व औषध प्रशासन, महाराष्ट्र राज्य, धुळे यांनी तातडीने दखल घेत कारवाई सुरू केली.
सहायक आयुक्त (अन्न) गोपाल माहोरे यांच्या मार्गदर्शनाखाली
अभिजीत जाधव – अन्न सुरक्षा अधिकारी
शशिकांत राणे – अन्न सुरक्षा अधिकारी
प्रमोद ईशी – पोलीस हवालदार
यांच्या पथकाने मौजे बालदे, ता. शिरपूर येथे तपासणी मोहीम राबवत संशयित दुधाचे नमुने घेतले. संबंधित नमुने प्रयोगशाळेत तपासणीसाठी पाठविण्यात आले असून अहवाल आल्यानंतर पुढील कायदेशीर कारवाई केली जाणार असल्याची माहिती अधिकाऱ्यांनी दिली.
यापूर्वीही घडला होता असा प्रकार
विशेष म्हणजे शिरपूर तालुक्यात तीन ते चार महिन्यांपूर्वीही भेसळयुक्त दुधाचा प्रकार उघडकीस आला होता. मात्र त्या घटनेनंतरही ठोस आणि कठोर कारवाई झाली नसल्याची तक्रार नागरिकांकडून करण्यात येत आहे.
नागरिकांच्या आरोग्याचा प्रश्न ऐरणीवर
भेसळयुक्त दुधामुळे लहान मुले, वृद्ध नागरिक आणि रुग्णांच्या आरोग्यावर गंभीर परिणाम होऊ शकतो. त्यामुळे दुधात नेमकी कोणती रासायनिक भेसळ केली जाते याचा शोध घेणे अत्यंत गरजेचे असल्याचे तज्ज्ञांचे मत आहे.
कठोर कारवाईची नागरिकांची मागणी
या घटनेनंतर परिसरातील नागरिकांनी अन्न व औषध प्रशासनाने संपूर्ण तालुक्यातील दुध विक्रेत्यांची सखोल तपासणी करून दोषींवर कठोर कायदेशीर कारवाई करावी, अशी जोरदार मागणी केली आहे.
दरम्यान, प्रयोगशाळेचा अहवाल आल्यानंतर या प्रकरणातील सत्य समोर येणार असून भेसळ करणाऱ्यांवर मोठी कारवाई होण्याची शक्यता व्यक्त केली जात आहे.
मुख्य संपादक – गणेश दगा पाटील.
