शिरपूर, केंद्र व राज्य सरकारच्या विविध सामाजिक अर्थ सहाय्य योजनांचे अनुदान आता थेट लाभार्थ्यांच्या बँक खात्यात DBT (Direct Benefit Transfer) प्रणालीद्वारे जमा होणार आहे. यामध्ये इंदिरा गांधी राष्ट्रीय वृध्दापकाळ निवृत्ती वेतन योजना, विधवा योजना, दिव्यांग योजना, संजय गांधी निराधार योजना, श्रावणबाळ योजना तसेच राष्ट्रीय कुटुंब अर्थ सहाय्य योजना यांचा समावेश आहे.
एप्रिल २०२५ पासून या योजना DBT पद्धतीने कार्यान्वित करण्यात आल्या असून, त्यासाठी लाभार्थ्यांचे आधार क्रमांक त्यांच्या बँक खात्यांशी लिंक असणे अत्यावश्यक ठरविण्यात आले आहे. यासोबतच आधार कार्डावरील नाव व मोबाईल क्रमांक हे बँकेच्या खात्यातील माहितीशी सुसंगत असणे गरजेचे आहे.
या पार्श्वभूमीवर १७ जुलै २०२५ रोजी तहसील कार्यालय, शिरपूर येथे सर्व राष्ट्रीयकृत बँकांच्या अधिकाऱ्यांची एक विशेष बैठक आयोजित करण्यात आली होती. या बैठकीत बँक प्रतिनिधींनी माहिती दिली की, अनेक लाभार्थ्यांची KYC पूर्ण झालेली नसून त्यांच्या खात्यांमध्ये आधार लिंक केलेले नाही. त्यामुळे त्यांना DBT अनुदान मिळण्यात अडचणी येत आहेत.
तहसीलदार कार्यालयाने स्पष्ट केले की, ज्यांचे आधार बँक खात्याशी लिंक नाही, त्यांनी लवकरात लवकर बँकेत जाऊन e-KYC प्रक्रिया पूर्ण करावी, अन्यथा त्यांना अनुदान प्राप्त होणार नाही.
तहसीलदार, शिरपूर यांनी सर्व संबंधित लाभार्थ्यांना आवाहन केले आहे की, तातडीने आधार कार्ड अपडेट करून ते खात्याला लिंक करावे, जेणेकरून शासनाच्या योजनांचा लाभ वेळेवर मिळू शकेल.
तरी सामाजिक अर्थ सहाय्य योजनांच्या लाभार्थ्यांना आवाहन करण्यात येते की, DBT मार्फत अनुदान खातेवर पडणेकामी लाभार्थ्यांनी त्यांचे आधार कार्ड अपडेट करून ते बँकेला लिंक करणेकामी बँकेत KYC करणे आवश्यक आहे. तरच त्यांना DBT मार्फत अनुदान त्यांचे आधार लिंक असलेल्या बैंक खातेवर पडतील, याची नोंद घ्यावी.
तहसीलदार शिरपूर
महेंद्र माळी
मुख्य संपादक – गणेश दगा पाटील.
