शिरपूर (प्रतिनिधी): विविध शासकीय कामकाज व योजनांची प्रभावी अंमलबजावणी केल्याबद्दल शिरपूरचे तहसीलदार महेंद्र माळी यांना धुळे जिल्हाधिकारी भाग्यश्री विसपुते यांच्या हस्ते ‘प्रशस्तीपत्र’ देऊन गौरवण्यात आले.
महसूल विभागाच्या वतीने आयोजित महसूल दिन २०२५ च्या कार्यक्रमात हा सन्मान प्रदान करण्यात आला. १ ऑगस्ट २०२४ ते ३१ जुलै २०२५ या कालावधीत त्यांनी महसूल संकलन, गौणखनिज वसुली, निवडणूक व्यवस्थापन, तसेच विविध शासकीय योजनांच्या अंमलबजावणीत उल्लेखनीय कामगिरी केली.
विशेषतः, ई-फेरफार प्रणाली, संजय गांधी निराधार योजना, तसेच लोकसभा व विधानसभा निवडणूक २०२४ मधील अचूक नियोजन आणि अंमलबजावणी यामुळे त्यांचे कार्य वाखाणण्याजोगे ठरले आहे. याचबरोबर, राज्य शासनाच्या १०० दिवसीय कार्यालयीन सुधारणा कार्यक्रमात शिरपूर तहसील कार्यालयाने नाशिक विभागात तिसरा क्रमांक मिळवत आदर्श निर्माण केला आहे.
या यशाबद्दल उपविभागीय अधिकारी डॉ. शरद मंडलिक यांनीही तहसीलदार माळी यांचे विशेष अभिनंदन केले. जिल्हाधिकारी भाग्यश्री विसपुते यांनीही शासकीय अधिकारी/कर्मचाऱ्यांच्या कार्याचा गौरव केल्यास त्यांच्या कार्यक्षमता वाढते आणि इतरांसाठीही प्रेरणा निर्माण होते, असे नमूद केले.
तहसीलदार माळी यांच्या नेतृत्वाखाली शिरपूर तालुक्यात प्रभावी व लोकाभिमुख प्रशासन कार्यरत असल्याने हा सन्मान त्यांना प्रदान करण्यात आला आहे.
मुख्य संपादक – गणेश दगा पाटील.
