शिरपूर | प्रतिनिधी ऑनलाईन शेअर मार्केटमध्ये अल्पावधीत मोठा परतावा मिळवून देण्याचे आमिष दाखवत तब्बल ३ कोटी १४ लाख रुपयांची फसवणूक करणाऱ्या आंतरराज्यीय कॉल सेंटर टोळीचा धुळे सायबर पोलिसांनी पर्दाफाश केला आहे. या प्रकरणात चार आरोपींना अटक करण्यात आली असून दोन आरोपी फरार आहेत. विशेष म्हणजे, पोलिसांनी तात्काळ कारवाई करत फिर्यादीचे तब्बल १ कोटी १९ लाख रुपये परत मिळवून देण्यात यश मिळवले आहे. फिर्यादी हर्षद नारायण देशपांडे (रा. स्नेहनगर, धुळे) यांना व्हॉट्सअॅप लिंकद्वारे “848 FYERS HNI VIP Growth Hub” या ग्रुपमध्ये जोडण्यात आले होते. आरोपींनी “FYERS INDIA (HNI)” नावाचे बनावट अॅप डाउनलोड करण्यास सांगून सुरुवातीला शेअर मार्केटमध्ये नफा दाखवला. विश्वास बसल्यानंतर विविध बँक खात्यांमध्ये RTGS, NEFT आणि UPI द्वारे तब्बल ३,१४,९९,८९१ रुपये जमा करून घेतले. मात्र, कोणताही परतावा न देता आरोपींनी फिर्यादीची फसवणूक केली. या प्रकरणी धुळे सायबर पोलीस ठाण्यात BNS कलम 318(4), 319(2) तसेच आयटी अॅक्ट कलम 66(D) अंतर्गत गुन्हा दाखल करण्यात आला आहे. नायगावमध्ये बनावट कॉल सेंटर सायबर पोलिसांनी तांत्रिक विश्लेषण आणि सखोल तपास करत वसईतील नायगाव येथे सुरू असलेले बनावट कॉल सेंटर उघडकीस आणले. बनावट सिमकार्डचा वापर करून आरोपी देशभरातील नागरिकांना IPO आणि शेअर ट्रेडिंगमध्ये जास्त नफा मिळवून देण्याचे आमिष दाखवत होते. अटक आरोपी साबिर मोहम्मद खान (नवी मुंबई) सनत संजीव दास (वसई) राहुलकुमार शुक्ला ऊर्फ कैलाश (मिरारोड) आमिर करमशेर खान (झारखंड) तर अभिषेक नारकर ऊर्फ गोपाल आणि रोशनकुमार शेट्टी हे आरोपी फरार असून त्यांचा शोध सुरू आहे. नागरिकांना पोलिसांचे आवाहन सायबर पोलिसांनी नागरिकांना आवाहन केले आहे की, ऑनलाईन शेअर मार्केटमध्ये गुंतवणूक करताना केवळ SEBI नोंदणीकृत ब्रोकर्समार्फतच व्यवहार करावेत. कोणत्याही अनोळखी लिंक, बनावट अॅप किंवा जास्त परताव्याच्या आमिषाला बळी पडू नये.
ही कारवाई यांनी केलीमा. पोलीस अधीक्षक श्री. विशाल आनंद (भा.पो.से.) व अपर पोलीस अधीक्षक श्री. अजय देवरे यांच्या मार्गदर्शनाखाली पार पडली. सायबर पोलीस ठाण्याचे प्रभारी अधिकारी श्री. अभिजित सोनवणे यांच्या नेतृत्वात पोलीस अंमलदार राजेंद्र मोरे, भूषण खलाणेकर, दिनेश श्रीराव, प्रसाद वाघ, चेतन सोनगीरे, हेमंत वागले, तुषार पोतदार, विवेक बिलाडे, महेश मराठे, शितल लोहार, प्रियंका देवरे व इंदिरा वाघ यांनी ही उल्लेखनीय कामगिरी बजावली
मुख्य संपादक – गणेश दगा पाटील.
