शिरपूर, प्रतिनिधी : धुळे जिल्ह्यातील शिरपूर तालुक्यातील जामण्यापाणी गावाजवळील वन्यजीव अभयारण्यात गांजाची अवैध लागवड उघडकीस आल्यानंतर आता स्थानिक पोलीस यंत्रणेच्या भूमिकेबाबत प्रश्न उपस्थित होऊ लागले आहेत. महसूल गुप्तचर संचालनालय (डीआरआय) आणि केंद्रीय नार्कोटिक्स ब्युरो (सीबीएन) यांच्या संयुक्त पथकाने १४ ऑक्टोबर २०२६ रोजी कारवाई करत तब्बल ७.०८ एकर क्षेत्रावरील गांजाचे पीक नष्ट केले. मात्र, इतक्या मोठ्या प्रमाणावर दुर्गम जंगलात अवैध लागवड सुरू असताना शिरपूर तालुका पोलीस नेमके काय करत होते, असा सवाल आता उपस्थित होत आहे.
बाहेरील यंत्रणांची कारवाई; स्थानिक पोलिसांच्या कार्यक्षमतेवर चर्चा
मिळालेल्या माहितीनुसार, डीआरआय आणि केंद्रीय नार्कोटिक्स ब्युरोच्या संयुक्त पथकाने विशिष्ट गुप्त माहितीच्या आधारे जामण्यापाणी परिसरातील जंगलात मोहीम राबवली. या कारवाईत पाच वेगवेगळ्या ठिकाणी गांजाची लागवड आढळून आली. एकूण २.८७ हेक्टर म्हणजेच ७.०८ एकर क्षेत्रावरील पीक नष्ट करण्यात आले.
या कारवाईसाठी बाहेरील केंद्रीय यंत्रणांना पुढाकार घ्यावा लागल्याने स्थानिक पोलीस यंत्रणेच्या माहिती संकलनावर आणि गस्त व्यवस्थेवर प्रश्न उपस्थित होत आहेत. संबंधित भागात गांजाची लागवड किती काळापासून सुरू होती? याबाबत स्थानिक पोलिसांना पूर्वकल्पना होती का? असल्यास, यापूर्वी कारवाई का झाली नाही? आणि माहिती नसेल, तर दुर्गम जंगलातील अवैध हालचाली शोधण्यात स्थानिक यंत्रणा कमी पडली का? असे अनेक प्रश्न उपस्थित होत आहेत.
दुर्गम जंगलात अवैध लागवड, यंत्रणांच्या समन्वयाची गरज
जंगलातील दुर्गम परिसर, वन्यप्राण्यांचा संभाव्य धोका आणि मोबाईल नेटवर्कचा अभाव यांसारख्या अडचणींचा सामना करत केंद्रीय पथकाने ही कारवाई पूर्ण केली. पोलिस आणि वन विभागाच्या अधिकाऱ्यांच्या उपस्थितीत रोटाव्हेटरच्या साहाय्याने गांजाचे पीक नष्ट करण्यात आले.
मात्र, अशा प्रकारची अवैध लागवड रोखण्यासाठी स्थानिक पोलीस, वन विभाग आणि अमली पदार्थविरोधी यंत्रणांमध्ये प्रभावी समन्वय असणे आवश्यक आहे. बाहेरील यंत्रणांनी येऊन एवढ्या मोठ्या प्रमाणावर कारवाई केल्यानंतर स्थानिक पातळीवरील प्रतिबंधात्मक उपाययोजनांचा आढावा घेण्याची गरज निर्माण झाली आहे.
वरिष्ठ पोलीस अधिकाऱ्यांनी लक्ष घालण्याची गरज
या प्रकरणात शिरपूर तालुका पोलिसांची नेमकी भूमिका काय होती, याची स्पष्टता अद्याप समोर आलेली नाही. त्यामुळे वरिष्ठ पोलीस अधिकाऱ्यांनी या प्रकरणाची वस्तुस्थिती तपासून आवश्यक ती माहिती जनतेसमोर मांडावी, अशी अपेक्षा व्यक्त होत आहे.
एकीकडे अमली पदार्थमुक्त समाजाचा संकल्प केला जात असताना, दुसरीकडे तालुक्यातील जंगलात मोठ्या क्षेत्रावर गांजाची अवैध लागवड आढळून येणे ही गंभीर बाब आहे. केंद्रीय यंत्रणांच्या कारवाईनंतर आता स्थानिक पोलीस यंत्रणा या प्रश्नांची उत्तरे कशी देते, याकडे नागरिकांचे लक्ष लागले आहे.
मुख्य संपादक – गणेश दगा पाटील.
