शिरपूर | प्रतिनिधी
शिरपूर शहरात काल मध्यरात्री एटीएम फोडून मोठी रक्कम लंपास करण्याचा कट नागरिकांच्या सतर्कतेमुळे उघडकीस आला असून, प्रसंगावधानामुळे मोठा अनर्थ टळला आहे. अज्ञात संशयितांनी नियोजनपूर्वक एटीएम मशीन फोडण्याचा प्रयत्न केला असताना परिसरातील नागरिकांच्या जागरूकतेमुळे हा प्रकार वेळीच उधळून लावण्यात आला.
मिळालेल्या माहितीनुसार, रात्रीच्या सुमारास काही इसम पिकअप वाहनातून एटीएमजवळ थांबले आणि मशीन फोडण्याचा प्रयत्न सुरू केला. असामान्य हालचाली लक्षात येताच नागरिकांनी आरडाओरड करत पाठलाग सुरू केला. नागरिकांचा वाढता पाठलाग व गोंधळ पाहून घाबरलेल्या संशयितांनी घटनास्थळावरून पळ काढत जवळच्या शेतात अंधाराचा फायदा घेत फरार होण्याचा प्रयत्न केला.
घटनेची माहिती मिळताच शिरपूर शहर पोलिसांनी तात्काळ घटनास्थळी धाव घेत पिकअप वाहन ताब्यात घेतले. वाहनामध्ये चोरीसाठी वापरण्यात येणारी उपकरणे असल्याची शक्यता असून, त्याची सखोल तपासणी सुरू आहे. वाहनाच्या नोंदणी क्रमांकावरून व सीसीटीव्ही फुटेजच्या आधारे संशयितांचा माग काढण्याचे प्रयत्न वेगाने सुरू आहेत.
पोलिसांनी परिसरात तात्काळ नाकाबंदी केली असून आसपासच्या गावांमध्येही सतर्कतेचा इशारा देण्यात आला आहे. फरार आरोपींना लवकरच अटक करण्यात येईल, असा विश्वास पोलिसांनी व्यक्त केला आहे
नागरिकांच्या धाडस व सजगतेमुळे मोठी आर्थिक हानी टळली आहे. शिरपूर शहर पोलिसांनी या प्रकरणी गुन्हा नोंदवून पुढील तपास सुरू केला आहे.
मुख्य संपादक – गणेश दगा पाटील.
