शिरपूर (प्रतिनिधी) : शिरपूर तालुक्यातील सेंधवा-शिरपूर महामार्गावर गुरुवारी सकाळी घडलेल्या भीषण अपघाताने परिसर हादरला. नटवाडे फाट्यालगत पाटील ढाब्यासमोर भरधाव वेगाने धावणाऱ्या स्कार्पिओ कारने सप्तश्रृंगी गडाकडे पायी निघालेल्या महिला भाविकांना जोरदार धडक दिली. या हृदयद्रावक अपघातात एका महिलेचा जागीच मृत्यू झाला, तर एक युवती गंभीर जखमी झाली आहे.
अपघाताची थरारक घटना
सकाळी सुमारे ११.१५ वाजण्याच्या सुमारास (क्र. 24 BH 67 19 H) क्रमांकाची स्कार्पिओ कार अचानक नियंत्रणाबाहेर गेली आणि रस्त्याच्या कडेला चालणाऱ्या भाविकांवर धडकली. धडकेचा जोर इतका जबरदस्त होता की परिसरात एकच गोंधळ उडाला.
या अपघातात सखुबाई बाबूलाल भिल (वय ३५, रा. सुळे) यांचा जागीच मृत्यू झाला. तर मनीषा कालूसिंग पावरा (वय १६) या गंभीर जखमी झाल्या असून त्यांच्यावर शिरपूर उपजिल्हा रुग्णालयात उपचार सुरू आहेत. वैद्यकीय अधिकारी डॉ. शीतल शिंदे यांनी तपासणी करून सखुबाई भिल यांना मृत घोषित केले.
ग्रामस्थांचा संताप; ठिय्या आंदोलन
अपघाताची बातमी कळताच सुळे गावातील भाविक व ग्रामस्थ मोठ्या संख्येने घटनास्थळी जमा झाले. संतप्त नागरिकांनी काही काळ ठिय्या आंदोलन करत निषेध व्यक्त केला. यामुळे महामार्गावरील वाहतूक काही वेळ पूर्णपणे ठप्प झाली होती.
पोलिसांची धावपळ; परिस्थिती नियंत्रणात
घटनेची माहिती मिळताच शिरपूर तालुका पोलीस, थाळनेर पोलीस व महामार्ग पोलीस तात्काळ घटनास्थळी दाखल झाले. त्यांनी जमावाला शांत करत परिस्थिती नियंत्रणात आणली व वाहतूक सुरळीत केली.
टायर फुटल्याने अपघाताचा प्राथमिक अंदाज
प्राथमिक माहितीनुसार, स्कार्पिओ वाहनाचा टायर अचानक फुटल्याने चालकाचे वाहनावरील नियंत्रण सुटले आणि हा भीषण अपघात घडला असावा, असा अंदाज व्यक्त केला जात आहे. संबंधित चालक हा सैन्यात कार्यरत असून तो पत्नीसमवेत कर्तव्यावर हजर होण्यासाठी प्रवास करत असल्याची माहिती समोर आली आहे.
आमदारांची तात्काळ भेट
अपघाताची माहिती मिळताच आमदार काशिराम पावरा यांनी तात्काळ रुग्णालयात भेट देऊन जखमींची विचारपूस केली. त्यानंतर त्यांनी घटनास्थळाची पाहणी केली. यावेळी पोलीस निरीक्षक जयपाल हिरे व एपीआय हेमंत पाटील यांच्यासह पोलीस कर्मचारी उपस्थित होते.पुढील तपास सुरूया प्रकरणी शिरपूर तालुका पोलीसांकडून पुढील तपास सुरू असून अपघाताचे नेमके कारण शोधले जात आहे.
मुख्य संपादक – गणेश दगा पाटील.
