शिरपुर| प्रतिनिधी
बकरी ईद उत्सवाच्या पार्श्वभूमीवर धुळे जिल्हा पोलिसांनी मंगळवारी मध्यरात्री राबविलेल्या विशेष ‘नाकाबंदी व कोंबिंग ऑपरेशन’मुळे गुन्हेगारी प्रवृत्तीच्या व्यक्तींमध्ये मोठी खळबळ उडाली. पोलीस अधीक्षक विशाल आनंद यांच्या आदेशानुसार जिल्हाभर एकाच वेळी धडक कारवाई करण्यात आली. कायदा व सुव्यवस्था अबाधित राखण्यासाठी राबविण्यात आलेल्या या मोहिमेत गुन्हेगार, अवैध धंदे, वाहतूक नियमभंग करणारे चालक आणि संशयितांवर कठोर कारवाई करण्यात आली.
दि. २६ मे रोजी रात्री १० ते १२ या वेळेत जिल्ह्यातील २४ महत्त्वाच्या नाक्यांवर कडक नाकाबंदी लावण्यात आली होती. या कारवाईदरम्यान पोलिसांनी तब्बल ९३७ वाहनांची तपासणी केली. संशयित वाहनांची झडती घेऊन चालकांची कसून चौकशी करण्यात आली.
या मोहिमेदरम्यान प्राणी संरक्षण कायद्यान्वये ३ गुन्हे दाखल करण्यात आले असून, सुमारे ४ लाख ९ हजार रुपये किमतीच्या १५ गोवंशांची सुटका करण्यात आली. अवैध जनावर वाहतुकीवर पोलिसांनी प्रभावी कारवाई करत संबंधितांविरुद्ध कायदेशीर प्रक्रिया सुरू केली आहे.
अवैध मद्यनिर्मिती व हातभट्टी व्यवसायावरही पोलिसांनी मोठा प्रहार केला. जिल्ह्यातील विविध भागांत ५ हातभट्ट्यांवर छापेमारी करून १४ हजार ८०० रुपये किमतीची दारू व रसायन जागीच नष्ट करण्यात आले. या कारवाईमुळे अवैध व्यवसायिकांचे धाबे दणाणले आहेत.
स्थानिक गुन्हे शाखेने देखील या मोहिमेत उल्लेखनीय कामगिरी बजावली. चाळीसगाव रोड पोलीस ठाण्याच्या अभिलेखावरील दोन अट्टल फरार आरोपी हेमंत पाटील व पापा फरोज शहा यांना पोलिसांनी शिताफीने अटक करून बेड्या ठोकल्या. फरार आरोपींना पकडण्यात आलेल्या या कारवाईमुळे पोलिसांच्या गुप्त माहिती यंत्रणेची कार्यक्षमता पुन्हा अधोरेखित झाली.
वाहतूक नियमांचे उल्लंघन करणाऱ्यांवरही कठोर कारवाई करण्यात आली. २४२ वाहनचालकांकडून १ लाख ५७ हजार ४५० रुपयांचा दंड वसूल करण्यात आला. तसेच मद्यप्राशन करून वाहन चालविणाऱ्या चालकांविरोधात ड्रंक अँड ड्राईव्ह अंतर्गत कारवाई करत ३० हजार रुपयांचा दंड आकारण्यात आला.
विशेष मोहिमेदरम्यान पोलिसांनी २५ हिस्ट्रीशीटरांची पडताळणी केली. तसेच ७३ हॉटेल्स-ढाबे आणि २१ मोकळ्या मैदानांची तपासणी करून संशयास्पद हालचालींवर बारकाईने लक्ष ठेवण्यात आले.
कायदा मोडणाऱ्यांना पोलिसांचा स्पष्ट इशारा
जिल्ह्यात शांतता, सामाजिक सलोखा आणि कायदा-सुव्यवस्था कायम राखण्यासाठी अशा प्रकारच्या विशेष मोहिमा यापुढेही सातत्याने राबविण्यात येणार असून, गुन्हेगारी व अवैध कृत्यांना कोणतीही सवलत दिली जाणार नाही, असा स्पष्ट इशारा धुळे पोलिस प्रशासनाने दिला आहे.
मुख्य संपादक – गणेश दगा पाटील.
