शिरपूर शेतकऱ्यांना अवैध पद्धतीने कर्ज देऊन त्यांच्याकडून दुप्पट-तिप्पट वसुली करणाऱ्या सावकारांवर सहकार विभागाने धडक कारवाई करत शहरात खळबळ उडवली आहे. भामपूर (ता. शिरपूर) व गोराणे (ता. शिंदखेडा) येथील दोन शेतकऱ्यांनी केलेल्या गंभीर तक्रारीनंतर बुधवारी (ता. १८) सहकार विभागाच्या पथकाने दोन ठिकाणी छापे टाकून महत्त्वाचा मुद्देमाल जप्त केला.
तक्रारदार शेतकऱ्यांनी दिलेल्या माहितीनुसार, शिरपूर येथील बाजार समिती परिसरात ‘गांगेश्वर ट्रेडिंग कंपनी’ चालविणारे व्यापारी मुकेश रमेशचंद्र अग्रवाल यांनी जून २०२५ मध्ये दोघांना प्रत्येकी ७५ हजार रुपये, असे एकूण दीड लाख रुपये उसनवार दिले होते. मात्र, केवळ चार महिन्यांतच या कर्जाची परतफेड करताना संबंधित शेतकऱ्यांकडून तब्बल ३ लाख ७० हजार रुपये वसूल करण्यात आले.
धक्कादायक बाब म्हणजे एवढी मोठी रक्कम परतफेड करूनही संबंधित सावकाराकडून अजून पैशांची मागणी केली जात होती. यासोबतच शिवीगाळ, दमदाटी व धमक्या दिल्या जात असल्याचा गंभीर आरोप तक्रारीत करण्यात आला आहे.
या प्रकरणाची दखल घेत सहायक निबंधक राजेंद्र वीरकर यांनी तात्काळ दोन स्वतंत्र पथके गठित केली. या पथकांनी गुरुवारी संबंधित व्यापाऱ्याचे दुकान तसेच शहरातील पित्रेश्वर कॉलनीतील निवासस्थानी एकाचवेळी छापा टाकला. सुमारे तीन तास चाललेल्या या कारवाईदरम्यान अधिकाऱ्यांनी सखोल तपासणी केली.
छाप्यामध्ये चार कोरे धनादेश, व्यवहाराच्या दोन नोंदवह्या आणि इतर महत्त्वाची कागदपत्रे जप्त करण्यात आली. या कागदपत्रांच्या आधारे अवैध सावकारीचा मोठा गैरव्यवहार उघडकीस येण्याची शक्यता व्यक्त केली जात आहे.
याबाबत बोलताना सहायक निबंधक राजेंद्र वीरकर यांनी सांगितले की, जप्त करण्यात आलेल्या कागदपत्रांची सखोल चौकशी करून संबंधितांवर कडक कायदेशीर कारवाई करण्यात येणार आहे. तसेच, शेतकऱ्यांनी अशा प्रकारच्या अवैध सावकारीविरोधात निर्भीडपणे पुढे येऊन तक्रार करावी, असे आवाहनही त्यांनी केले.
मुख्य संपादक – गणेश दगा पाटील.
