शिरपुर |प्रतिनिधी
धुळ्यात गुन्हेगार मोकाट, कायदा-सुव्यवस्था वाऱ्यावर. एकीकडे ठाणेदार हवालदारासाठी वरिष्ठांकडे हात जोडतात, ड्युटी करता करता पोलिसांची हाडं खिळखिळी होतात. आणि दुसरीकडे शिरपूर तालुका सांगवी पोलीस ठाणे? अहो, हे तर धुळ्याचं “स्वित्झर्लंड”! वरकमाईवाल्यांसाठी नंदनवन!
“अजब तुझा कारभार, सांगवी सरकार”..!
मंजूर गाड्या फक्त दोन. पण स्टेअरिंग धरायला ड्रायव्हर नेमले पाच आणि एका गाडीमागे अडीच ड्रायव्हर – हा आकडा बघून गणिताचं पण डोकं फिरेल. हे “पंचरत्न” आहेत तरी कोण? चालक. साहेब, हे गाडी चालवतात की ठाण्यात बसून फक्त चहा पितात? जनतेच्या पैशावर असला तमाशा?
१५ “गेस्ट आर्टिस्ट” कुणाच्या वशिल्याने?
मंजूर पदांपेक्षा १५ पोलिस कर्मचारी जास्त आहेत. जिल्ह्यातली इतर पोलिस ठाण्यात मनुष्यबळासाठी तडफडत असताना इथे मात्र जवान शिळे होत पडलेत.
हा काय “मामा-भाच्याचा” वाटा आहे का? कुणाच्या फोनवर या बदल्या झाल्या? कुणाच्या ताटाखालचं मांजर आहे?
पोलीस खात्यात दबक्या आवाजात चर्चा आहे – “वजन” ठेवल्याशिवाय सांगवीत पोस्टिंग मिळत नाही! हे मात्र तेवढं सत्य आहे. असे सांगितलं जातं.
आई-बहीण सुरक्षित कुठे.?
बलात्कार, विनयभंग, कौटुंबिक हिंसाचार… बाईने तक्रार घेऊन जायचं कुठे? सांगवीत महिला पोलीस शोधावी लागते भिंग घेऊन. १५ पोलिस कर्मचारीची फौज पोसायला पैसे आहेत, पण माहिला कॉन्स्टेबल द्यायला खात्याकडे बजेट नाही? तर पीडितेच्या डोळ्यातले पाणी पुसायला तरी कुणी महिला पोलीस हवी की नको?
एसपी साहेब, डोळे उघडा..!
हा सावळा गोंधळ किती दिवस चालणार? सांगवी पोलिस ठाण्यावर एवढी “ममता” का? बाकीच्या ठाण्यांच्या कपाळावर काय “अवदसेचं” कुंकू लावलंय?
जनता विचारतेय – या “मेहेरबानी”चा रेट काय?
एसपी साहेब, आता तरी या “लाडक्या” ठाण्याचं बस्तान हलवा. समान वाटप करा, नाहीतर उद्या धुळे जिल्हा पोलीस दलात अजून नवीन चर्चेचा विषय तयार होण्यास मदत होईल.
मुख्य संपादक – गणेश दगा पाटील.
