शिरपूर तालुक्यात मंगळवारी दुपारी सिनेमालाही लाजवेल असा थरार उडाला. अवैध दारू वाहतूक करणारा प्रदीप नावनाथसिंग गिरासे (रा. पळासनेर) हा उत्पादन शुल्क विभागाच्या नजरेतून पळ काढण्यासाठी अक्षरशः रान पेटवून धावू लागला. त्याच्या हातातल्या स्टेअरिंगने काही क्षणात दोन सरकारी यंत्रणांच्या जीवाला धोका निर्माण केला.
पहिली धडक : उत्पादन शुल्क निरीक्षकांच्या वाहनाला
उत्पादन शुल्क निरीक्षक नेहुल आणि त्यांची टीम अवैध दारू वाहतूक करणाऱ्या वाहनाच्या मागावर होती. तेवढ्यात गिरासेने पळून जाण्याच्या नादात त्यांच्या सरकारी वाहनालाच जोरदार धडक दिली. क्षणभर उपस्थितांची धावपळ उडाली.
नाकाबंदीवर दुसरा जीवघेणा हल्ला
घटनास्थळापासून काही अंतरावर चिमठाणे येथे पोलिसांनी नाकाबंदी उभारली होती. अंमलदार पवार हे वाहन थांबवण्यासाठी पुढे सरसावले. पण गिरासेने गाडी थेट त्यांच्या अंगावर चढवण्याचा प्रयत्न करत नाकाबंदी फोडून पळ काढला. घटनास्थळी उपस्थितांचे हृदय थरारून गेले.
दराणे फाटा : ग्रामस्थांचा शौर्यपूर्ण प्रयत्न
पळत असलेला आरोपी दराणे फाट्याकडे धावत असताना पूनमसिंग गिरासे व अन्य ६–७ ग्रामस्थांनी धाडसाने त्याला थांबवण्याचा प्रयत्न केला. मात्र आरोपीने त्यांच्या दिशेनेही वाहन घालण्याचा प्रयत्न करत जीविताला गंभीर धोका निर्माण केला. काही क्षणांसाठी परिसरात प्रचंड गोंधळाचे वातावरण निर्माण झाले.
शेवटी पोलिसांचा अचूक डाव – आरोपी ताब्यात
दराणे फाटा परिसरात मोठ्या शर्थीने पोलिसांनी पाठलाग सुरू ठेवला. चढाओढ, आरडाओरड आणि धुमश्चक्रीच्या या नाट्यमय प्रसंगानंतर शेवटी पथकाने आरोपीला जेरबंद करण्यात यश मिळवले.
गाडीतून ४४ बॉक्स विदेशी मद्य जप्त
आरोपीच्या वाहनाची झडती घेतली असता त्यात ४४ बॉक्स विदेशी मद्य आढळून आले. पोलिसांनी गाडी, मद्य व आरोपी ताब्यात घेत पुढील कारवाई सुरू केली आहे
मुख्य संपादक – गणेश दगा पाटील.
