शिरपुर प्रतिनिधी
कायद्याचे रक्षण करणाऱ्यांचाच कायदा हातात घेण्याचा धक्कादायक प्रकार शिरपूर तालुक्यात उघडकीस आला आहे. वडिलांवर दाखल असलेल्या गुन्ह्यात मदत करून अटक टाळण्यासाठी तब्बल ३ लाख रुपयांच्या लाचेची मागणी करून, तडजोडीनंतर २ लाख रुपये स्वीकारताना थाळनेर पोलीस ठाण्यातील एका पोलीस कॉन्स्टेबलला लाचलुचपत प्रतिबंधक विभागाने (ACB) रंगेहात पकडले. या प्रकरणी एकूण चार पोलीस कर्मचाऱ्यांवर गुन्हा दाखल करण्यात आला असून, पोलीस खात्याच्या प्रतिमेला काळीमा फासणारी ही घटना खळबळजनक ठरली आहे.
नेमकी घटना काय?
तक्रारदार हे शिरपूर तालुक्यातील रहिवासी आहेत. त्यांच्या वडिलांविरुद्ध १८ ऑक्टोबर २०२३ रोजी थाळनेर पोलीस ठाण्यात अमली पदार्थ विरोधी कायदा (NDPS Act) अंतर्गत गुन्हा दाखल करण्यात आला होता. या गुन्ह्यात वडिलांना अटक होऊ नये, तसेच प्रकरणात ‘मदत’ करण्याच्या बदल्यात थाळनेर पोलीस ठाण्यातील काही कर्मचाऱ्यांनी तक्रारदाराकडे ३ लाख रुपयांची लाच मागितल्याचा आरोप आहे.
या मागणीमुळे हैराण झालेल्या तक्रारदाराने थेट लाचलुचपत प्रतिबंधक विभागाकडे धाव घेत तक्रार दाखल केली. त्यानंतर ८ जानेवारी २०२६ रोजी एसीबीने तक्रारीची पडताळणी केली असता, संबंधित चारही पोलीस कर्मचाऱ्यांनी एकत्रितपणे तडजोडीअंती २ लाख रुपये स्वीकारण्याचे मान्य केल्याचे स्पष्ट झाले.
एसीबीचा सापळा अन् थरारक कारवाई
पडताळणी यशस्वी झाल्यानंतर १२ जानेवारी २०२६ रोजी एसीबीच्या पथकाने थाळनेर परिसरात सापळा रचला. नियोजित ठिकाणी तक्रारदाराकडून २ लाख रुपयांची रक्कम स्वीकारताना पोलीस कॉन्स्टेबल मुकेश गिलदार पावरा याने स्वतः पैसे हातात घेतले. याच क्षणी दबा धरून बसलेल्या एसीबीच्या पथकाने धडक कारवाई करत पावराला रंगेहात पकडले. या कारवाईमुळे परिसरात एकच खळबळ उडाली.
आरोपींची नावे
मुकेश गिलदार पावरा – पोलीस कॉन्स्टेबल (ब. नं. १५९३)
भूषण यशपाल रामोळे – पोलीस हवालदार (ब. नं. ०७)
धनराज वचन मालचे – पोलीस कॉन्स्टेबल (ब. नं. १४५८)
किरण सखाराम सोनवणे – पोलीस कॉन्स्टेबल (ब. नं. १६९६)
(सर्वांची नेमणूक – थाळनेर पोलीस स्टेशन)
वरिष्ठ अधिकाऱ्यांच्या मार्गदर्शनाखाली कारवाई
ही संपूर्ण कारवाई लाचलुचपत प्रतिबंधक विभाग, नाशिक परिक्षेत्र यांच्या मार्गदर्शनाखाली पार पडली. या प्रकरणात पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या नेतृत्वाखाली कारवाई करण्यात आली. सापळा पथकात पोलीस उपाधीक्षक सचिन साळुंखे पोलीस निरीक्षक पद्मावती कलाल, यशवंत बोरसे यांच्यासह इतर अधिकारी व कर्मचारी सहभागी होते.
मुख्य संपादक – गणेश दगा पाटील.
