धुळे | प्रतिनिधी
धुळे शहराच्या सार्वजनिक वाहतूक व्यवस्थेत आधुनिकतेचा नवा अध्याय सुरू करत महाराष्ट्र राज्य मार्ग परिवहन महामंडळाच्या वतीने धुळे बस स्थानक येथे १० अत्याधुनिक ई-बस सेवांचे उद्घाटन उत्साहात पार पडले. या नव्या ई-बस सेवेमुळे धुळेकर नागरिकांना सुरक्षित, आरामदायी आणि प्रदूषणमुक्त प्रवासाचा अनुभव मिळणार आहे.
पूर्णतः वातानुकूलित असलेल्या या ई-बस मध्ये आरामदायी अॅडजस्टेबल सीट्स, मोबाईल चार्जिंग पॉइंट, आकर्षक अंतर्गत रचना आणि आधुनिक सुरक्षा सुविधा उपलब्ध करण्यात आल्या आहेत. शहरातील प्रवाशांना अधिक सुखकर व तंत्रज्ञानस्नेही प्रवास मिळावा, या उद्देशाने ही सेवा सुरू करण्यात आली आहे.
विशेष म्हणजे या ई-बसच्या संचालनासाठी धुळे आगार येथे ८ अत्याधुनिक चार्जिंग स्टेशन उभारण्यात आले असून, पर्यावरणपूरक तंत्रज्ञानाचा वापर करून वाहतूक व्यवस्थेला नवे स्वरूप देण्याचा प्रयत्न करण्यात आला आहे. वाढते प्रदूषण कमी करून स्वच्छ आणि हरित शहर उभारण्याच्या दृष्टीने ही योजना महत्त्वाची मानली जात आहे.
धुळे शहराच्या विकासाला गती देत सर्वसामान्य नागरिकांसाठी दर्जेदार वाहतूक सुविधा उपलब्ध करून देण्याचा शासनाचा प्रयत्न या माध्यमातून दिसून येत आहे. शहराच्या वाढत्या गरजा लक्षात घेता आधुनिक ई-बस सेवा भविष्यातील स्मार्ट वाहतूक व्यवस्थेची सुरुवात ठरणार असल्याचे मत उपस्थितांनी व्यक्त केले.
धुळे शहरासाठी ई-बस उपलब्ध करून दिल्याबद्दल महाराष्ट्राचे मुख्यमंत्री मा. श्री. देवेंद्र फडणवीस यांचे आभार मानण्यात आले. तसेच महाराष्ट्र शासन, परिवहन विभाग आणि महाराष्ट्र राज्य मार्ग परिवहन महामंडळाच्या कार्याचेही कौतुक करण्यात आले.
यावेळी पुरुषोत्तम व्यवहारे (विभागीय नियंत्रक), उमेश बिरारी (विभागीय वाहतूक अधिकारी), पंकज देवरे (आगार व्यवस्थापक), हर्षल पाटील (सहाय्यक कार्यशाळा अधीक्षक), समाधान खांडेकर (व्यवस्थापन पर्यवेक्षक), संजय अवस्थी (विभागीय वाहतूक अधिकारी), मनोज पवार (कनिष्ठ आगार व्यवस्थापक), अमित दुशाने यांच्यासह परिवहन विभागाचे अधिकारी व कर्मचारी मोठ्या संख्येने उपस्थित होते.
मुख्य संपादक – गणेश दगा पाटील.
