शिरपूर : इंग्लंड विरुद्ध ऑस्ट्रेलिया या आंतरराष्ट्रीय क्रिकेट सामन्यावर ऑनलाइन जुगार खेळवल्याच्या संशयावरून १६ बुकींविरोधात शहर पोलिसांनी गुन्हा दाखल केला आहे. शहरातील प्रसिद्ध मल्हार रिजेन्सी हॉटेलात चालू असलेल्या बेटिंग रॅकेटचा पर्दाफाश करून पोलिसांनी मोठी कारवाई केली.
पोलीस निरीक्षक किशोरकुमार परदेशी यांना विश्वसनीय सूत्रांमार्फत माहिती मिळाली होती की, एका व्यक्तीमार्फत हॉटेलमध्ये बसून मोठ्या प्रमाणात क्रिकेट बेटिंगचे बुकिंग चालू आहे. माहितीची खात्री करून त्यांनी शनिवारी (ता. २२) रात्री सहकाऱ्यांसह हॉटेलवर छापा टाकला.
छाप्यात एक जेरबंद, मोठा मुद्देमाल जप्त
कारवाईत पोलिसांनी एका संशयिताला ताब्यात घेतले. त्याच्याकडून
- मोबाईल फोन,
- विविध सिमकार्ड,
- बुकिंग नोंदी असलेली वह्या,
- रोकड रक्कम
असा मुद्देमाल जप्त करण्यात आला.
प्राथमिक चौकशीत संशयिताने इंग्लंड–ऑस्ट्रेलिया सामन्यावर ऑनलाइन जुगार खेळवण्यासाठी वेगवेगळ्या आयडी आणि पासवर्डचा वापर केल्याचे समोर आले.
मुंबई आणि मध्य प्रदेशातील जाळे उघडकीस
उपलब्ध माहितीच्या आधारे मुंबई आणि मध्य प्रदेशातील एकूण १६ बुकींविरोधात गुन्हा दाखल करण्यात आला आहे.
या प्रकरणातील आणखी काही साथीदारांना ताब्यात घेण्यासाठी पोलिसांची विशेष पथके रवाना झाली आहेत.
मोठ्या आंतरराष्ट्रीय रॅकेटचा सुगावा
ऑनलाइन बेटिंगसाठी वापरलेले नेटवर्क, व्यवहारांची पद्धत आणि मिळालेल्या आयडींच्या आधारे मोठ्या आंतरराष्ट्रीय टोळीचा मागोवा लागण्याची शक्यता पोलिस सूत्रांकडून व्यक्त करण्यात येत आहे.
शिरपूर शहर पोलिसांच्या या कारवाईमुळे क्रिकेट बेटिंग रॅकेटला मोठा धक्का बसला असून, पुढील तपास वेगाने सुरू आहे.
मुख्य संपादक – गणेश दगा पाटील.
