शिरपूर (प्रतिनिधी): शिरपूर तालुक्यातील पोलीस भरतीची तयारी करणाऱ्या युवक-युवतींसाठी एक मोठी संधी उपलब्ध झाली असून “आ. अमरिशभाई पटेल पोलीस भरती प्रशिक्षण केंद्र” मार्फत दि. १५ मार्च २०२६ रोजी पोलीस भरती प्रशिक्षण शिबिर व निवड चाचणी आयोजित करण्यात आली आहे. या उपक्रमामुळे ग्रामीण भागातील तरुणांना पोलीस दलात प्रवेश करण्यासाठी सक्षम मार्गदर्शन मिळणार आहे.
हे प्रशिक्षण आर.सी. पटेल फार्मसी महाविद्यालयाच्या मैदानावर दि. १५ मार्च रोजी सकाळी ७.०० ते १०.०० वाजेपर्यंत घेण्यात येणार आहे. या शिबिरामध्ये पोलीस भरतीसह वनरक्षक भरती, एसएससी जीडी भरती, रेल्वे भरती आणि अग्निवीर भरती यांसारख्या विविध स्पर्धा परीक्षांसाठीही विशेष मार्गदर्शन व शारीरिक प्रशिक्षण दिले जाणार आहे.
या प्रशिक्षणासाठी सेवानिवृत्त पोलीस निरीक्षक ए. एस. आगरकर हे प्रमुख मार्गदर्शक म्हणून उपस्थित राहून उमेदवारांना शारीरिक चाचणी, धाव, व्यायाम, तसेच भरती प्रक्रियेबाबत महत्त्वपूर्ण मार्गदर्शन करणार आहेत. इच्छुक युवक-युवतींनी अधिक माहितीसाठी 98902 92230 किंवा 91129 16776 या मोबाईल क्रमांकांवर संपर्क साधावा असे आवाहन करण्यात आले आहे.
एस.व्ही.के.एम.चे अध्यक्ष तथा माजी मंत्री आमदार अमरिशभाई पटेल, आमदार काशिराम दादा पावरा आणि एस.व्ही.के.एम. सह-अध्यक्ष भूपेशभाई पटेल यांच्या संकल्पना व मार्गदर्शनातून श्री विलेपार्ले केळवणी मंडळ तर्फे शिरपूर तालुक्यातील युवक-युवतींसाठी ही प्रशिक्षण सुविधा उपलब्ध करून देण्यात आली आहे. टप्प्याटप्प्याने आयोजित करण्यात येणाऱ्या या शिबिरांचा अनेक विद्यार्थ्यांना मोठा फायदा होत आहे.
गेल्या दोन वर्षांपासून सुरू असलेल्या या उपक्रमातून असंख्य मुलामुलींची विविध सरकारी सेवांमध्ये निवड झाली असून अनेकांना नोकरीची संधी मिळाली आहे. त्यामुळे आगामी भरती प्रक्रियेची तयारी करणाऱ्या तरुणांसाठी हे प्रशिक्षण शिबिर अत्यंत उपयुक्त ठरणार आहे.
शिरपूर तालुक्यातील इच्छुक युवक-युवतींनी या सुवर्णसंधीचा लाभ घ्यावा, असे आवाहन सेवानिवृत्त पोलीस निरीक्षक अन्साराम आगरकर यांनी केले आहे.
मुख्य संपादक – गणेश दगा पाटील.
