शिरपूर तालुक्यातील २०२५ ते २०३० या निवडणूक कालावधीसाठी ११८ ग्रामपंचायतींच्या सरपंच पदासाठी आरक्षण सोडत तहसिल कार्यालय, शिरपूर येथे आज तहसीलदार महेंद्र माळी यांच्या अध्यक्षतेखाली पार पडली. या आरक्षण प्रक्रियेसाठी ग्रामपंचायतीचे पदाधिकारी, सरपंच पदाचे इच्छुक उमेदवार व ग्रामस्थ मोठ्या संख्येने उपस्थित होते.
यावेळी अनुसूचित क्षेत्रातील ५० ग्रामपंचायती अनुसूचित जमाती (पेसा) प्रवर्गासाठी आरक्षित करण्यात आल्या असून त्यात नटवाडे, चाकडू, शेमल्या, हिंगोणीपाडा, जामण्यापाडा, न्यू बोराडी, रोहीणी, चिलारे, दुर्बडया, भोईटी, आणि इतर ग्रामपंचायतींचा समावेश आहे.
बिगर अनुसूचित क्षेत्रात अनुसूचित जातींसाठी ४ ग्रामपंचायती – भोरटेक, रुदावली, अंतुर्ली आणि अर्थ बु. – आरक्षित करण्यात आल्या आहेत. तर अनुसूचित जमातीसाठी १४ ग्रामपंचायती आणि इतर मागासवर्गीयांसाठी १९ ग्रामपंचायती आरक्षित ठरविण्यात आल्या आहेत.
या व्यतिरिक्त, ३१ ग्रामपंचायती सर्वसाधारण प्रवर्गासाठी आरक्षित असून त्यात सावळदे, भोरखेडा, लोंढर, ताजपुरी, करवंद, उंटावद, अजंदे खु., बाभुळदे, तरडी, जैतपूर, आमोदे, बोरगाव इत्यादींचा समावेश आहे.
आरक्षण प्रक्रिया पारदर्शक व शांततेत पार पडली असून, येणाऱ्या निवडणुकीत विविध समाजघटकांना प्रतिनिधित्व मिळावे या हेतूने आरक्षणाचे वितरण करण्यात आले असल्याची माहिती तहसीलदार श्री. महेंद्र माळी यांनी दिली.
मुख्य संपादक – गणेश दगा पाटील.
