शिरपूर | शिरपूर-वरवाडे नगरपरिषद सार्वत्रिक निवडणूक 2025 ची तयारी जोरात सुरू असून, निवडणूक प्रक्रियेतील पारदर्शकता आणि शिस्तबद्धतेसाठी भंडारी सभागृह, शिरपूर येथे मतदान कर्मचारी व अधिकाऱ्यांचा प्रशिक्षण वर्ग उत्साहात पार पडला. सदर प्रशिक्षणात निवडणूक प्रक्रियेतील प्रत्येक टप्प्याचे सखोल मार्गदर्शन देण्यात आले.
४०० कर्मचार्यांची नेमणूक – ३५० कर्मचारी प्रशिक्षणास उपस्थित
या निवडणुकीसाठी एकूण ४०० मतदान कर्मचारी आणि अधिकारी नेमणूक करण्यात आले आहेत. त्यापैकी ३५० कर्मचारी प्रशिक्षणास उपस्थित राहिले. मात्र ५० कर्मचारी गैरहजर राहिल्याने निवडणूक नियमांनुसार संबंधितांवर कारवाईची प्रक्रिया सुरू करण्यात आली आहे.
गैरहजर कर्मचार्यांना महाराष्ट्र नगर परिषद अधिनियम 1965 च्या कलम 30 व 31 अन्वये ‘कारणे दाखवा’ नोटीस देण्यात आली आहे.
तहसीलदार महेंद्र माळी आणि मुख्याधिकारी प्रशांत सरोदे यांचे मार्गदर्शन
प्रशिक्षण वर्गाचे नेतृत्व तहसीलदार महेंद्र माळी यांनी केले. त्यांनी मतदानादिवशी अंमलात येणाऱ्या मूलभूत जबाबदाऱ्या, आचारसंहितेचे पालन, मतदान केंद्रावरील कायदा-सुव्यवस्था आणि शासकीय कामातील दक्षतेबाबत महत्त्वपूर्ण मार्गदर्शन केले.
त्या बरोबरच नगरपरिषद मुख्याधिकारी प्रशांत सरोदे यांनी निवडणूक दिनाच्या तांत्रिक बाबी, कर्मचारी समन्वय, सुविधा व्यवस्थापन आणि मतदारांना दिल्या जाणाऱ्या सेवांची माहिती सविस्तर दिली.
निवडणूक निर्णय अधिकारी सी. एस. देशमुख यांची महत्वपूर्ण सूचना
निवडणूक निर्णय अधिकारी सी. एस. देशमुख यांनी राज्य निवडणूक आयोगाच्या मार्गदर्शक सूचनांची माहिती देत मतदान केंद्रावरील प्रत्येक कर्मचाऱ्याची भूमिका स्पष्ट केली. मतदान प्रक्रियेतील त्रुटी टाळण्यासाठी काळजीपूर्वक काम करण्यावर त्यांनी विशेष भर दिला.
मतदान यंत्राचे प्रात्यक्षिक — तीन मतदानांचा अधिकार स्पष्ट
प्रशिक्षणादरम्यान मतदान कर्मचाऱ्यांना मतदान यंत्रांचे प्रत्यक्ष प्रात्यक्षिक देण्यात आले. EVM मशीन कसे वापरायचे, बॅलेट युनिटवरील मतदानाची पद्धत, नियंत्रण युनिटचा उपयोग इत्यादी बाबींची प्रत्यक्ष सराव सत्रांद्वारे माहिती देण्यात आली.
सदर निवडणुकीत प्रत्येक मतदाराला एकूण तीन मतदान करण्याचा अधिकार असल्याचेही स्पष्ट करण्यात आले. हे मतदान कोणत्या कोणत्या पदांसाठी होते आणि ते कोणत्या क्रमाने करावयाचे याबाबत सविस्तर मार्गदर्शन देण्यात आले.
निवडणुकीसाठी तयारी पूर्ण क्षमतेने
शिरपूर-वरवाडे नगरपरिषद निवडणूक शांततेत आणि सुरळीत पार पाडण्यासाठी प्रशासन सज्ज असून, मतदान कर्मचारी प्रशिक्षणाने संपूर्ण कार्यसंघ निवडणूक दिनासाठी तयार झाल्याचे चित्र स्पष्ट दिसले.
मुख्य संपादक – गणेश दगा पाटील.
