धुळे | प्रतिनिधी
धुळे जिल्हा पोलीस दलात आता शिस्त आणि रस्ता सुरक्षेबाबत मोठा निर्णय घेण्यात आला असून, जिल्हा पोलीस अधीक्षक विशाल आनंद यांनी हेल्मेट वापराबाबत कडक भूमिका घेतली आहे. यापुढे दुचाकीवरून येणाऱ्या कोणत्याही पोलीस अधिकारी किंवा कर्मचाऱ्याला हेल्मेटशिवाय पोलीस अधीक्षक कार्यालयात प्रवेश दिला जाणार नाही.
पोलीस अधीक्षक विशाल आनंद यांनी स्वतः पुढाकार घेत “आधी स्वतः नियम पाळा, मग जनतेला सांगण्याचा अधिकार मिळतो,” असा स्पष्ट संदेश दिला आहे. या निर्णयानंतर पोलीस दलात हेल्मेट वापर अनिवार्य करण्यात आला असून, नियम मोडणाऱ्यांवर कठोर कारवाईचे संकेतही देण्यात आले आहेत.
वाहतूक नियमांचे पालन आणि अपघातांमध्ये होणारी जीवितहानी कमी करण्यासाठी पोलीस प्रशासन सातत्याने जनजागृती करत असते. मात्र आता स्वतः पोलीस दलानेच शिस्तीचा आदर्श निर्माण करण्याचा निर्धार केल्याने या निर्णयाचे सर्वत्र स्वागत होत आहे.
या नव्या नियमामुळे पोलीस अधिकारी व कर्मचाऱ्यांमध्ये जबाबदारीची भावना अधिक दृढ होणार असून, सामान्य नागरिकांमध्येही हेल्मेट वापराबाबत सकारात्मक संदेश जाणार असल्याची चर्चा सुरू आहे.
“हेल्मेट नाही… तर एन्ट्री नाही!”
धुळे पोलिसांच्या या निर्णयाची सध्या जिल्हाभर जोरदार चर्चा रंगली आहे
मुख्य संपादक – गणेश दगा पाटील.
