शिरपूर | प्रतिनिधी
धुळे जिल्ह्यासाठी अभिमानाची बाब ठरलेल्या बार कौन्सिल ऑफ महाराष्ट्र आणि गोवा निवडणुकीत शिरपूरचे सुपुत्र तथा उच्च न्यायालयातील ज्येष्ठ विधिज्ञ ॲड. ज्ञानेश्वर बागुल यांनी दणदणीत विजय मिळवत सदस्यपद पटकावले आहे. राज्यभरातील वकिलांचा विश्वास संपादन करत त्यांनी या प्रतिष्ठेच्या निवडणुकीत उल्लेखनीय यश मिळवले.
गेल्या 26 वर्षांपासून मुंबई उच्च न्यायालयाच्या छत्रपती संभाजीनगर खंडपीठात यशस्वीपणे वकिली करणारे ॲड. बागुल हे धुळे बारचे सक्रिय सदस्य आहेत. एकल संक्रमण मतदान पद्धतीने झालेल्या या निवडणुकीत त्यांना महाराष्ट्र आणि गोव्यातील विविध बार असोसिएशनमधून मोठ्या प्रमाणात प्रथम पसंतीची मते मिळाली.
विशेष म्हणजे धुळे, शिरपूर, शिंदखेडा, साक्री, दोंडाईचा यांच्यासह जळगाव व नंदुरबार जिल्ह्यातील वकिलांनी त्यांना उत्स्फूर्त पाठिंबा दिला. त्यामुळे त्यांना सर्वाधिक प्राधान्यक्रमाची मते प्राप्त झाल्याचे सांगितले जात आहे.
महाराष्ट्र शासनाचे पॅनल ॲडव्होकेट म्हणून कार्यरत असलेले ॲड. बागुल यांनी धुळे जिल्हा परिषद, शिरपूर, चोपडा व नंदुरबार नगर परिषद तसेच विविध सहकारी संस्था, साखर कारखाने आणि शैक्षणिक संस्थांचे कायदेशीर प्रतिनिधित्व केले आहे. अनेक गाजलेल्या प्रकरणांमध्ये त्यांनी प्रभावी युक्तिवाद करून आपली स्वतंत्र ओळख निर्माण केली आहे.
शिरपूर नगर परिषदेच्या माजी नगराध्यक्षा कुसुमताई बागुल आणि ज्येष्ठ समाजसेवक सुरेश बागुल यांचे सुपुत्र असलेल्या ॲड. ज्ञानेश्वर बागुल यांच्या विजयाचे सर्वत्र स्वागत होत आहे. धुळे, जळगाव, नंदुरबार आणि नाशिक जिल्ह्यातील विधी क्षेत्रातील मान्यवरांनी त्यांचे अभिनंदन करत त्यांच्या पुढील कार्यासाठी शुभेच्छा दिल्या आहेत.
बार कौन्सिलमध्ये त्यांच्या नेतृत्वामुळे वकिलांच्या प्रश्नांना अधिक प्रभावीपणे न्याय मिळेल, तसेच न्यायव्यवस्थेच्या बळकटीसाठी नवे पर्व सुरू होईल, असा विश्वास विधी क्षेत्रातील जाणकारांनी व्यक्त केला आहे.
मुख्य संपादक – गणेश दगा पाटील.
