शिरपूर | प्रतिनिधी
महाराष्ट्रभर ATM मशीन फोडून बँकिंग व्यवस्थेला हादरवणाऱ्या टोळीचा अखेर शिरपूर शहर पोलिसांनी पर्दाफाश केला आहे. दि. 17 जानेवारी 2026 रोजी पहाटे 02.15 वाजता, उपजिल्हा रुग्णालयासमोरील बँक ऑफ बडोदा ATM मशीनला लोखंडी साखळी बांधून पिकअप वाहनाने ओढून चोरी करण्याचा थरारक प्रयत्न सुरू असल्याची माहिती गस्तीवरील पोलिसांना मिळाली.क्षणाचाही विलंब न करता पोलिसांनी घटनास्थळी धाव घेतली. मात्र अंधाराचा फायदा घेत आरोपी पसार झाले. काही अंतरावरच पित्रेश्वर स्टॉपजवळ संशयास्पद पिकअप आढळताच आरोपींनी पोलिसांना पाहून थेट शहादा फाट्याकडे पलायन केले.
45 मिनिटे… वेग, धूर आणि ठिणग्या!
मुंबई–आग्रा महामार्ग, नाकाबंदी, बॅरिकेट्स उडवत, दहिवद गावात घुसत, पुन्हा महामार्गावर येत आरोपींनी पोलिसांना अक्षरशः झुलवले. पिकअपला बांधलेली 20 फूट लोखंडी साखळी रस्त्यावर घास घेत ठिणग्या उडवत होती, तरीही पोलिसांनी जीवाची पर्वा न करता पाठलाग सोडला नाही.पोलिसांचा ससेमिरा सुटत नाही हे लक्षात येताच आरोपींनी चालत्या वाहनातून उड्या मारून पळ काढला.तपासचक्र फिरलं… आणि मुसक्या आवळल्या!पो.नि. किशोरकुमार परदेशी यांच्या मार्गदर्शनाखाली तपास पथक उभे राहिले आणि काही तासांतच टोळीपर्यंत पोलीस पोहोचले.अटक करण्यात आलेले आरोपी—• हेमंत सुकलाल माळी (21), भिरडई, धुळे• विदुर उर्फ विजय देवा जाधव (40), वसंतनगर, पारोळा, जळगावचौकशीत धक्कादायक बाब समोर आली—YouTube पाहून ATM फोडण्याचे धडे, आणि प्रत्यक्ष गुन्ह्यांची मालिकाच!शिरपूर, धुळे व अंमळनेर येथील अनेक ATM फोडी या टोळीने केल्याचे उघड झाले असून, आरोपींवर गंभीर कलमान्वये गुन्हे दाखल आहेत.पिकअप वाहन जप्त करण्यात आले असून आरोपींना 5 दिवसांची पोलीस कोठडी सुनावण्यात आली आहे.
पोलिसांना सलाम!
ही कारवाई यांनी केली
पोलीस अधिक्षक श्री. श्रीकांत धिवरे, मा. अपर पोलीस अधिक्षक श्री. अजय देवरे तसेच उप-विभागीय पोलीस अधिकारी श्री. सुनिल गोसावी यांचे मार्गदर्शनाखाली शिरपूर शहर पो.स्टे.चे पोलीस निरीक्षक श्री. किशोरकुमार परदेशी, पोउनि/संदिप दरवडे, पोहेकॉ रविंद्र आखडमल, राजेंद्र रोकडे, पोकॉ/आरीफ तडवी, सचिन वाघ, जितेंद्र आहिरराव, योगेश दाभाडे, गोविंद कोळी, भटु साळुंके, विनोद आखडमल, मनोज महाजन, प्रशांत पवार, सोमा ठाकरे, मनोज दाभाडे व चा.पो.कॉ. रविंद्र महाले अशांनी मिळून केली आहे.
मुख्य संपादक – गणेश दगा पाटील.
