शिरपूर वरवाडे नगरपरिषद सार्वत्रिक निवडणूक 2025 च्या तयारीत एक महत्त्वाचा टप्पा आज पूर्ण झाला. नगरपरिषद निवडणुकीसाठी येत्या 2 डिसेंबर 2025 रोजी होणाऱ्या मतदानासाठी वापरण्यात येणाऱ्या मतदान यंत्रांची सीलिंग प्रक्रिया (Sealing Process) टाऊन हॉल, शिरपूर येथे उमेदवार व त्यांच्या प्रतिनिधींच्या उपस्थितीत अत्यंत पारदर्शक आणि नियमबद्ध पद्धतीने पार पडली.
आज रोजी झालेल्या या प्रक्रियेत नगरपरिषद पदांसाठी उभे असलेल्या सर्व उमेदवारांना प्रभागनिहाय मतदान यंत्रांची तपासणी करण्याची संधी देण्यात आली. नगराध्यक्ष पद आणि 32 नगरसेवक पदांसाठी स्वतंत्रपणे मतदान यंत्रांची सीलिंग करण्यात आली.
वरिष्ठ अधिकाऱ्यांच्या मार्गदर्शनाखाली प्रक्रिया
या महत्त्वपूर्ण कामकाजाचे मार्गदर्शन सी. एस. देशमुख, निवडणूक निर्णय अधिकारी महेंद्र माळी, तहसीलदार शिरपूर प्रशांत सरोदे, मुख्याधिकारी नगरपरिषद शिरपूर यांनी केले. प्रत्येक यंत्राची तपासणी, सीलिंग, सीरियल नंबर नोंदणी आणि सुरक्षित पॅकिंग पूर्णतः नियमांनुसार करण्यात आली.
अभिरूप मतदानाने प्रक्रियेला मिळाली खात्री
सीलिंगनंतर उमेदवारांच्या प्रतिनिधींच्या समक्ष अभिरूप (Mock Poll) मतदान देखील घेण्यात आले.प्रत्येक प्रभागातील मतदान यंत्रांची अचूकता तपासण्यासाठी —एकूण यंत्रांपैकी 10 टक्के प्रत्येक मशीनवर 1000 अभिरूप मतेनोंदवून पडताळणी करण्यात आली.अभिरूप मतदानातील सर्व आकडे तंतोतंत जुळल्याने मतदान यंत्रे योग्य आणि विश्वसनीय असल्याची खात्री उमेदवार व त्यांच्या प्रतिनिधींना मिळाली.
निवडणूक प्रक्रिया सुरक्षित व पारदर्शक
संपूर्ण सीलिंग कार्यवाहीदरम्यान सर्व उमेदवार व त्यांचे प्रतिनिधी प्रत्यक्ष उपस्थित राहिल्याने निवडणूक प्रक्रियेचे पारदर्शकता, विश्वासार्हता आणि निष्पक्षता अधिक दृढ झाली आहे. मतदान केंद्रावर येणाऱ्या मतदारांनी आत्मविश्वासाने मतदान करता यावे, यासाठी प्रशासनाकडून काटेकोर तयारी करण्यात येत आहे.
पुढचा टप्पा : मतदान दिनांक 2 डिसेंबर
शिरपूर वरवाडे नगरपरिषद निवडणूक 2025 साठी 2 डिसेंबर 2025 रोजी मतदान पार पडणार असून, सर्व मतदान यंत्रे आता सुरक्षितरीत्या मतदान केंद्रांवर पोहोचविण्याची तयारी प्रशासनाने सुरू केली आहे
मुख्य संपादक – गणेश दगा पाटील.
