शिरपूर |प्रतिनिधी
धुळ्याच्या पोलीस वर्तुळात सध्या एकाच ‘बदली-बॉम्ब’ची चर्चा तोंडातोंडी रंगलीय! नंदुरबारमधून धुळे जिल्ह्यात बदली होऊन आलेला एक ‘लकी’ कॉन्स्टेबल थेट मुख्यालयाला बगल देऊन शिरपूर तालुका पोलीस ठाण्यात ‘साहेब’ म्हणून अवतरलाय. ना मुख्यालयात हजेरी, ना आदेशाची वाट… थेट ‘वरून फोन’ आणि पोस्टिंग ओके!
नियम फक्त सर्वसामान्यांसाठी?
सर्वसाधारण कॉन्स्टेबल ते अधिकारी… बदली झाली की पहिला मुजरा जिल्हा पोलीस अधीक्षकांच्या दारात. हजेरी लाव, आदेश घे, मग जिथे सांगतील तिथे जा. हा नियमाचा ‘श्रीगणेशा’! पण इथे तर गणपती बसायच्या आधीच विसर्जन झालं. संबंधित ‘साहेबांचा खास’ कॉन्स्टेबल मुख्यालयात डोकावलाच नाही आणि सरळ शिरपूर तालुका ठाण्याच्या खुर्चीत विराजमान झाला.
‘आशीर्वाद’ कोणाचा? मंत्रालय की बंगला?
ठाण्यात कुजबुज सुरू आहे – “वरून फोन आला रे!” हा ‘वर’ कोण? कोणत्या बड्या नेत्याचा पीए? की कोणत्या ‘साहेबांच्या’ बंगल्यावरून ग्रीन सिग्नल? कॉन्स्टेबलच्या या ‘वीआयपी ट्रीटमेंट’मागे कोणता ‘गॉडफादर’ आहे, यावरूनच सध्या खाकी वर्दीत जोरदार खलबतं सुरू आहेत.
RTI चा बॉम्ब फुटणार!
या ‘मलाईदार पोस्टिंग’चा वास येताच एका जागरूकाने माहिती अधिकाराचा बॉम्ब टाकलाय. “मुख्यालयात हजेरीची नोंद कुठाय? पोस्टिंगचा आदेश कोणी काढला? सही कोणाची?” – असे तिखट सवाल विचारले जात आहेत. कागदपत्रं बाहेर आली की अनेकांच्या खुर्च्या हादरणार, हे नक्की!
सामान्य कॉन्स्टेबलमध्ये संतापाची लाट-
इकडे वर्षानुवर्षे एकाच ठाण्यात खितपत पडलेले, बदलीसाठी चकरा मारणारे कॉन्स्टेबल आता विचारतायत – “नियम फक्त आमच्यासाठीच का? आम्हाला मुख्यालयाचे उंबरे झिजवावे लागतात आणि ‘यांना’ थेट रेड कार्पेट?”
आता पुढे काय? SP घेणार का दखल?
सगळ्यांचे डोळे आता धुळे SP साहेबांकडे लागलेत. ही ‘नियमबाह्य’ पोस्टिंग रद्द होणार? की ‘आशीर्वाद’ देणाऱ्या हातापुढे कायद्याचं पुस्तक मिटणार? या ‘बायपास पोस्टिंग’ची फाईल उघडली तर आतून आणखी किती ‘हाडं’ बाहेर निघतील, याचीच उत्सुकता शिगेला पोहोचलीय.
एकच सवाल:-
खाकी वर्दीवरचा विश्वास टिकवायचा असेल, तर ‘साहेबांचा माणूस’ आणि ‘सामान्य कॉन्स्टेबल’ हा भेद मिटवावाच लागेल. नाहीतर उद्या प्रत्येक बदली ‘सेटिंग’नेच होईल!
मुख्य संपादक – गणेश दगा पाटील.
