शिरपुर| प्रतिनिधी
आज दिनांक २४ जुलै २०२६ रोजी मा. पोलीस अधीक्षक श्रीमती अश्विनी सानप यांच्या मार्गदर्शनाखाली नंदुरबार जिल्हा पोलीस दलाच्या दामिनी पथकाने शहादा येथील विकास हायस्कूल येथे भेट देऊन आषाढी एकादशी पालखी मिरवणूक कार्यक्रमात सहभाग नोंदवला.
यावेळी दामिनी पथकातील पोलीस हवालदार विकास अजगे, पोलीस हवालदार ज्योती पाटील, महिला पोलीस शिपाई सुनीता गावित, महिला पोलीस शिपाई आदिती राजवंशी तसेच वाहन चालक पोलीस हवालदार गोरख चव्हाण उपस्थित होते.
कार्यक्रमादरम्यान विद्यार्थी व विद्यार्थिनींना दामिनी पथकाच्या कार्याची सविस्तर माहिती देण्यात आली. तसेच संकटाच्या प्रसंगी स्वतःचा बचाव कसा करावा, सुरक्षिततेसाठी कोणत्या उपाययोजना कराव्यात, महिलांच्या व मुलींच्या सुरक्षेसाठी उपलब्ध असलेल्या विविध सुविधा आणि आपत्कालीन मदतीसाठी ‘डायल 112’ या सेवेबाबत मार्गदर्शन करण्यात आले.
या जनजागृती उपक्रमाला विद्यार्थ्यांनी उत्स्फूर्त प्रतिसाद दिला. पोलीस प्रशासनाच्या अशा उपक्रमांमुळे विद्यार्थ्यांमध्ये आत्मविश्वास वाढण्यासोबतच सुरक्षिततेबाबत जागरूकता निर्माण होत असल्याची भावना उपस्थितांनी व्यक्त केली.
मुख्य संपादक – गणेश दगा पाटील.
