धुळे (प्रतिनिधी) : धुळे जिल्ह्यातील नगाव परिसरात, हॉटेल राजधानीजवळ आज धावत्या टँकरला अचानक आग लागल्याची धक्कादायक घटना घडली. हा टँकर शिरपूरहून धुळ्याकडे येत असताना अचानक टँकरच्या कॅबिनने पेट घेतला. काही क्षणांतच आगीने रौद्ररूप धारण केल्याने परिसरात एकच खळबळ उडाली.
आगीचे लोट दूरवरून दिसू लागल्याने महामार्गावरून जाणाऱ्या वाहनचालकांमध्ये भीतीचे वातावरण पसरले. सुरक्षेच्या कारणास्तव अनेक वाहनचालकांनी आपली वाहने थांबवल्याने महामार्गावर मोठी वाहन कोंडी झाली. काही काळासाठी वाहतूक पूर्णतः ठप्प झाली होती.
घटनेची माहिती मिळताच अग्निशमन दल आणि पोलिसांनी घटनास्थळी धाव घेतली. अग्निशमन दलाने शर्थीचे प्रयत्न करत आग आटोक्यात आणली. सुदैवाने या घटनेत कोणतीही जीवितहानी झाल्याची माहिती नाही. मात्र टँकरचे कॅबिन मोठ्या प्रमाणात जळून खाक झाले आहे.
या टँकरला नेमकी कशामुळे आग लागली, तसेच टँकरमध्ये नेमके कोणते साहित्य होते, याबाबत अद्याप स्पष्ट माहिती मिळू शकलेली नाही. पोलिसांकडून घटनेचा अधिक तपास सुरू असून, आगीचे कारण शोधण्यासाठी तांत्रिक तपास केला जाणार आहे.
दरम्यान, या घटनेमुळे काही काळ परिसरात भीतीचे वातावरण निर्माण झाले होते. परिस्थिती नियंत्रणात आल्यानंतर हळूहळू वाहतूक सुरळीत करण्यात आली. प्रशासनाने वाहनचालकांना सतर्क राहण्याचे आवाहन केले आहे.
मुख्य संपादक – गणेश दगा पाटील.
