धुळे, शहरातील स्वस्तिक चित्रपटगृहाशी संबंधित मालमत्तेच्या दस्तावेजांमध्ये छेडछाड करून आणि बनावट नकाश्याचा वापर करून बेकायदेशीररित्या वारस नोंदवून खरेदीखताद्वारे मालमत्ता विकल्याचा गंभीर प्रकार उघडकीस आला आहे. या प्रकरणी नगर भूसंपादन कार्यालयातील चार कर्मचाऱ्यांना अटक करण्यात आली आहे.
या प्रकरणात हिरालाल शाह यांच्या नावासोबत दस्तावेजामध्ये असलेला कंस हटवून, प्रदीप शाह यांना मालमत्तेवर कारणापुरता उतारा देण्यात आला. या बनावट उताऱ्यावरून प्रदीप शाह यांच्या नावाने वारस म्हणून नोंद घेण्यात आली. विशेष म्हणजे, यासाठी बनावट नकाशा आणि मालमत्ता पत्रक तयार करण्यात आले होते.
धुळे शहर पोलीस ठाण्यात या प्रकरणी आनंद मोरे (डाटा एन्ट्री ऑपरेटर), धमेंद्र खंबाईत (परिरक्षण भूमापक), देवेंद्र टोपे (प्रमुख लिपीक) आणि धिरज बोरसे (लिपीक) यांच्या विरोधात गुन्हा दाखल करण्यात आला असून, त्यांना अटक करण्यात आली आहे.
या प्रकरणाचा तपास आर्थिक गुन्हे शाखेचे उपअधीक्षक विश्वजीत जाधव यांच्या मार्गदर्शनाखाली सुरू आहे. अमोल देवढे, सविता गवांदे, रवींद्र माळी, श्रीकांत पाटील, प्रभाकर बैसाणे, गणेश खैरनार आणि विलास पाटील यांच्या पथकाने अटकेची कारवाई केली.
मुख्य संपादक – गणेश दगा पाटील.
