शिरपूर शहरातील वरवाडे परिसरात घरगुती गॅस सिलेंडरच्या साहाय्याने वाहनांना गॅस भरण्याचा बेकायदेशीर व्यवसाय सुरू असल्याची गोपनीय माहिती मिळाल्यानंतर धुळे स्थानिक गुन्हे शाखेच्या (एलसीबी) पथकाने शनिवारी सकाळी धाड टाकत मोठी कारवाई केली. या कारवाईत मिनी गॅसपंप उद्धवस्त करण्यात आला असून एकाला पोलिसांनी ताब्यात घेतले आहे, तर दुसरा आरोपी फरार झाला आहे.
जिल्हा पोलीस अधीक्षक श्रीकांत धिवरे यांच्या आदेशानुसार आणि पोलीस निरीक्षक श्रीराम पवार यांना मिळालेल्या गोपनीय माहितीनुसार ही कारवाई राबविण्यात आली. एलसीबीचे पथक वरवाडे परिसरात पोहोचले असता, तेथे घरगुती गॅस सिलेंडरद्वारे वाहनांना गॅस भरण्याचे बेकायदेशीर काम सुरू असल्याचे उघड झाले.पोलिसांनी छापा टाकून गॅस सिलेंडर, इलेक्ट्रिक मोटर, नोझल व इतर साहित्य असा एकूण ₹18,400 किमतीचा मुद्देमाल जप्त केला. या प्रकरणात एक संशयिताला अटक करण्यात आली असून दुसरा आरोपी घटनास्थळावरून पसार झाला आहे. फरार आरोपीचा शोध सुरू आहे.
या कारवाईनंतर शहर पोलीस ठाण्यात गुन्हा दाखल करण्यात आला असून पुढील तपास पोलीसांकडून सुरू आहे. या कारवाईमुळे शहरात सुरू असलेल्या अशा प्रकारच्या बेकायदेशीर गॅसपंपांवर धाक निर्माण झाला आहे.
मुख्य संपादक – गणेश दगा पाटील.
