नकुल–हर्षलच्या दुर्दैवी मृत्यूने शिरपूर तालुक्यात शोककळा
शिरपूर | प्रतिनिधी
भोरखेडा गावाजवळील थाळनेर फाट्यावर मंगळवार, दि. 6 जानेवारी 2026 रोजी सायंकाळी साडेपाचच्या सुमारास घडलेल्या भीषण अपघातात नकुल दीपक चौधरी (वय 24) व हर्षल दीपक चौधरी (वय 22) या दोन सख्ख्या भावांचा दुर्दैवी मृत्यू झाला. अवजड डंपरने पाठीमागून दिलेल्या जोरदार धडकेत दोघेही जागीच ठार झाल्याने संपूर्ण शिरपूर तालुक्यात हळहळ व्यक्त केली जात आहे.
अपघाताचा सविस्तर तपशील
नकुल व हर्षल हे दोघे भाऊ शैक्षणिक कामासाठी चोपडा येथे शाळेचा दाखला घेण्यासाठी गेले होते. काम आटोपून ते आपल्या कडील शाईन मोटारसायकल (क्र. MH 18 CD 6226) ने शिरपूरकडे परतत असताना, चोपडा–शिरपूर मार्गावरील भोरखेडा गावाजवळ थाळनेर फाटा येथे असलेल्या वळणावर चोपड्याकडून थाळनेरच्या दिशेने जाणाऱ्या डंपर (क्र. MH 18 BZ 3220) च्या चालकाने बेदरकारपणे वाहन चालवत पाठीमागून ठोस धडक दिली. धडक इतकी भीषण होती की मोटारसायकलचा अक्षरशः चुराडा झाला आणि दोघेही रस्त्यावर फेकले गेले. गंभीर जखमांमुळे दोघांचाही जागीच मृत्यू झाला.
रुग्णालयात आणल्यानंतर मृत्यूची खात्री
अपघाताची माहिती मिळताच स्थानिक नागरिकांनी तत्काळ मदतीचा प्रयत्न केला. मात्र, दोघांची प्राणज्योत मालवली होती. मृतदेह कॉटेज रुग्णालय, शिरपूर येथे शवविच्छेदनासाठी आणण्यात आले. या घटनेची नोंद घेऊन पोलिसांनी डंपर ताब्यात घेतला असून गुन्हा दाखल करण्याची प्रक्रिया सुरू केली आहे.
कुटुंबावर दुःखाचा डोंगर
या भीषण अपघातामुळे वडील दीपक चौधरी व आई आरती चौधरी यांच्यावर दुःखाचा डोंगर कोसळला आहे. दोन तरुण मुलांचे एकाच वेळी जाणे हे कोणत्याही आई-वडिलांसाठी असह्य दुःख असून, त्यांच्या आक्रोशाने उपस्थितांचे डोळे पाणावले. संपूर्ण गाव व परिसरातील नागरिक शोकसागरात बुडाला आहे.
अवजड वाहनांच्या वाहतुकीवर प्रश्नचिन्ह
मागील काही महिन्यांपासून ग्रामीण व अंतर्गत रस्त्यांवरून अवजड डंपर व ट्रकची मोठ्या प्रमाणावर ये-जा सुरू आहे. वळणदार रस्ते, अपुरी सुरक्षा व्यवस्था आणि वेगावर नियंत्रण नसल्याने अपघातांची मालिका सुरूच आहे. याबाबत नागरिकांनी यापूर्वीही प्रशासनाकडे तक्रारी केल्या होत्या; मात्र, त्याकडे दुर्लक्ष झाल्याचे या दुर्दैवी घटनेतून पुन्हा एकदा समोर आले आहे.
नेते, पदाधिकारी व नागरिकांकडून सांत्वन
घटनेची माहिती मिळताच नवनिर्वाचित नगराध्यक्ष चिंतनभाई पटेल, सर्व नगरसेवक, विविध समाजातील पदाधिकारी, कार्यकर्ते तसेच शिवसेनेचे हेमंत पाटील यांच्यासह असंख्य नागरिकांनी घटनास्थळी व चौधरी कुटुंबीयांच्या निवासस्थानी भेट देऊन सांत्वन केले. ही बातमी शहरात व परिसरात वाऱ्यासारखी पसरताच शेकडो नागरिकांनी हळहळ व्यक्त केली.
सुरक्षेची मागणी तीव्र
या अपघातानंतर परिसरातील नागरिकांनी अवजड वाहनांच्या वाहतुकीवर निर्बंध, वेगमर्यादा, रस्त्यावर योग्य साइनबोर्ड, वळणांवर चेतावणी फलक व पोलिस बंदोबस्ताची तीव्र मागणी केली आहे. प्रशासनाने तातडीने कठोर उपाययोजना न केल्यास असे अपघात पुन्हा घडण्याची भीती व्यक्त होत आहे.
मुख्य संपादक – गणेश दगा पाटील.
