शिरपुर| प्रतिनिधी
धुळे येथील दुलारी गार्डनमध्ये शनिवारी (दि. ६ जून) शिवसेना (शिंदे गट) पक्षाची जिल्हास्तरीय आढावा बैठक उत्साहात पार पडली. या बैठकीत शिवसेना युवा नेते तथा खासदार डॉ. श्रीकांत शिंदे, शिक्षणमंत्री दादाजी भुसे, शिवसेना राष्ट्रीय सचिव भाऊसाहेब चौधरी, ज्येष्ठ नेते आनंद परांजपे, आमदार चंद्रकांत रघुवंशी, आमदार मंजुळा गावित, माजी आमदार शिरीष चौधरी, जिल्हाप्रमुख सतीष महाले यांच्यासह पक्षाचे अनेक वरिष्ठ पदाधिकारी उपस्थित होते.
यावेळी शिरपूर शहरातील युवा नेते तथा अल्पसंख्यांक विकास हक्क फाउंडेशनचे उत्तर महाराष्ट्र अध्यक्ष सलमान नूर काझी यांनी आपल्या शेकडो समर्थकांसह शिवसेना (शिंदे गट) मध्ये जाहीर प्रवेश करून राजकीय वर्तुळाचे लक्ष वेधून घेतले. त्यांच्या नेतृत्वाखाली मोठ्या संख्येने युवक आणि पदाधिकाऱ्यांनी पक्षप्रवेश केला.
प्रवेश करणाऱ्यांमध्ये मस्तुफा बोहरी, अबरार शेख, रहीम शेख, जाबीर मलक, रईस मलक, इरफान मण्यार, आरिफ मलक, उस्मान, कमिल शेख, कालू दादा, नासिर हारून बागवान, तालिब शेख, आकीब शाह, जुनेद खान, अफसर मलक, मुजाहिद शेख, अदनान सय्यद, जैद सय्यद, फैजान मलिक यांच्यासह शेकडो युवा कार्यकर्त्यांचा समावेश होता.
यावेळी बोलताना खासदार डॉ. श्रीकांत शिंदे यांनी शिरपूर शहरातील अल्पसंख्यांक विभागाच्या संघटनात्मक बांधणीसाठी आणि पक्षवाढीसाठी आवश्यक ते सर्व सहकार्य देण्याची ग्वाही दिली. “शिवसेना अधिक बळकट करण्यासाठी कार्यकर्त्यांना पूर्ण ताकद दिली जाईल,” असे त्यांनी स्पष्ट केले.
या भव्य पक्षप्रवेशामुळे शिरपूर शहरातील शिवसेनेची ताकद वाढणार असून आगामी स्थानिक राजकारणात त्याचे परिणाम दिसून येतील, अशी चर्चा राजकीय वर्तुळात सुरू आहे.
मुख्य संपादक – गणेश दगा पाटील.
