शिरपूर | प्रतिनिधी :
शिरपूर तालुक्यातील थाळनेर, नागेश्वर व परिसरात मंगळवार (दि. २७ जानेवारी) रोजी दुपारी अचानक वातावरणात मोठा बदल होत वादळी वाऱ्यासह जोरदार गारपीट झाली. अवघ्या काही मिनिटांत झालेल्या या अवकाळी गारपिटीने तालुक्यातील अनेक गावांमध्ये शेतीपिकांचे मोठ्या प्रमाणात नुकसान केले असून, शेतकरी वर्ग अक्षरशः हादरून गेला आहे.
अचानक ढगफुटीचा अनुभव, वाऱ्याचा तडाखा अन् गारांचा मारा
दुपारी सुमारे चार वाजेच्या सुमारास आकाशात अचानक दाट ढगांची गर्दी झाली. काही क्षणांतच जोरदार वादळी वारा सुटला आणि त्यानंतर गारांचा जोरदार मारा सुरू झाला.
या अवकाळी गारपिटीमुळे थाळनेर, अहिल्यापुर, वाठोडा, भाटपुरा, सावेर गोदी, नागेश्वर बंगला, अजनाड, तरडी, बभळाज आदी शिवारांतील उभ्या पिकांना मोठा फटका बसला आहे.
मका, गहू, ज्वारी, हरभरा तसेच केळी-पपईचे गंभीर नुकसान
या अवकाळी गारपिटीचा सर्वाधिक फटका मका, गहू, रब्बी ज्वारी, हरभरा या पिकांना बसला असून अनेक शेतांत पीक आडवे पडले आहे.
तसेच केळी व पपईच्या बागांमध्ये झाडे मोडली, काही ठिकाणी फळांची गळती होऊन उत्पादनावर मोठा परिणाम झाला आहे.
शेतकऱ्यांच्या म्हणण्यानुसार, काही ठिकाणी उभ्या पिकांचे शेंडे तुटले, तर काही शेतांत गारांच्या मारामुळे पीक अक्षरशः ठेचले गेले आहे. त्यामुळे हातातोंडाशी आलेले उत्पादन मोठ्या प्रमाणावर वाया गेले.
झाडे उन्मळून पडल्याने रहदारी ठप्प
वादळी वाऱ्याच्या तीव्र तडाख्यामुळे अनेक ठिकाणी रस्त्यावर झाडे उन्मळून पडली, परिणामी काही काळासाठी वाहतूक व रहदारी विस्कळीत झाली. काही गावांत विद्युत पुरवठ्यावरही परिणाम झाल्याची चर्चा नागरिकांमध्ये होती.
उत्पादन खर्च वाढलेला असतानाच संकटात भर
शेतीच्या वाढलेल्या उत्पादन खर्चामुळे आधीच अडचणीत असलेल्या शेतकऱ्यांवर या अवकाळी गारपिटीने मोठे संकट ओढावले आहे.
खते, बियाणे, औषध फवारणी, मजुरी यासाठी मोठा खर्च करून पीक हातात येण्याच्या टप्प्यात असतानाच निसर्गाने घातलेला घाला शेतकऱ्यांना आर्थिकदृष्ट्या मोठा धक्का देणारा ठरतो आहे.
तातडीने पंचनामे करून नुकसानभरपाई द्यावी – शेतकऱ्यांची मागणी
नुकसानग्रस्त शेतकऱ्यांनी प्रशासनाकडे तातडीने पंचनामे करण्याची व नुकसानभरपाई जाहीर करण्याची जोरदार मागणी केली आहे.
या गारपिटीची तीव्रता पाहता संबंधित विभागाने त्वरित पाहणी करून नुकसानाचा अहवाल तयार करावा, तसेच शेतकऱ्यांना दिलासा देण्यासाठी तात्काळ आर्थिक मदत जाहीर करावी, अशी अपेक्षा शेतकरी वर्गातून व्यक्त केली जात आहे.
मुख्य संपादक – गणेश दगा पाटील.
