शिरपूर | प्रतिनिधी
शिरपूर शहर स्वच्छ, सुंदर आणि रोगमुक्त ठेवण्याचा निर्धार करत लोकनियुक्त नगराध्यक्ष श्री. चिंतनभाई पटेल यांनी स्वच्छता मोहिमेला अधिक वेग दिला आहे. केवळ आदेश देण्यापुरते न थांबता ते स्वतः शहरातील विविध भागात जाऊन स्वच्छतेच्या कामांची पाहणी करत असून, संबंधित अधिकाऱ्यांना तातडीने आवश्यक उपाययोजना राबविण्याच्या सूचना देत आहेत.
आज नगराध्यक्षांनी करवंद नाका, शहादा रोड, स्वामी समर्थ मंदिर परिसर आणि बालाजी नगर या भागांना भेट देऊन स्वच्छतेची पाहणी केली. यावेळी त्यांनी नागरिकांशी थेट संवाद साधून परिसरातील स्वच्छतेसंदर्भातील अडचणी जाणून घेतल्या आणि त्या तातडीने सोडविण्याचे निर्देश दिले.
सध्या पावसाळ्याच्या पार्श्वभूमीवर डेंग्यू, मलेरिया, चिकनगुनिया यांसारख्या साथीच्या आजारांचा धोका वाढत असल्याने शहरातील नाले, गटारे, रस्ते आणि सार्वजनिक ठिकाणांची नियमित स्वच्छता व निर्जंतुकीकरण करण्यावर विशेष भर देण्यात येत आहे.
नगराध्यक्ष चिंतनभाई पटेल यांच्या या सक्रिय आणि लोकाभिमुख कार्यपद्धतीमुळे नागरिकांमध्ये समाधानाचे वातावरण निर्माण झाले असून, “स्वच्छ शिरपूर – निरोगी शिरपूर” ही संकल्पना प्रत्यक्षात साकार करण्यासाठी प्रशासन आणि नागरिक एकत्रितपणे काम करत असल्याचे चित्र दिसून येत आहे.
“स्वच्छ शहर ही केवळ प्रशासनाची नव्हे, तर प्रत्येक नागरिकाची सामूहिक जबाबदारी आहे,” असे आवाहन करत नगराध्यक्षांनी नागरिकांना स्वच्छता मोहिमेत सक्रिय सहभाग नोंदविण्याचे आवाहन केले आहे. नागरिकांच्या सहकार्यामुळेच शिरपूर शहर अधिक स्वच्छ, सुंदर आणि निरोगी बनणार असल्याचा विश्वासही त्यांनी व्यक्त केला
मुख्य संपादक – गणेश दगा पाटील.
