धुळे : शहरात डीजे आणि लेझर लाईटच्या वापरामुळे होणाऱ्या दुष्परिणामांविरोधात आता समाजातील सुजाण घटक रस्त्यावर उतरले आहेत. डीजे व लेझर लाईटच्या वापरावर कायमस्वरूपी बंदी घालावी, या ठाम मागणीसाठी इंडियन मेडिकल असोसिएशन (आयएमए), धुळे शाखेच्या वतीने येत्या शुक्रवार, दि. २९ ऑगस्ट रोजी सकाळी ९ वाजता छत्रपती शिवाजी महाराज पुतळ्यापासून एक मूक रॅली काढण्यात येणार आहे.
या रॅलीत शहरातील शाळा-महाविद्यालयांतील विद्यार्थी, विद्यार्थिनी, डॉक्टर्स, वकील, ज्येष्ठ नागरिक, महिला, खेळाडू, व्यापारी व व्यावसायिक या सर्वांनी मोठ्या संख्येने सहभागी व्हावे, असे आवाहन आयएमएने केले आहे.
उच्च न्यायालयाचा आदेश असूनही सुरू आहे दुरुपयोग
मा. उच्च न्यायालयाने डीजे आणि लेझर लाईटच्या वापरावर आधीच बंदी घातली आहे. परंतु प्रत्यक्षात अजूनही अनेक ठिकाणी मोठ्या आवाजात डीजे व तीव्र लेझर लाईटचा वापर केला जातो. काहींच्या बेपर्वाईमुळे संपूर्ण समाज त्रस्त होत आहे, असे आयएमएच्या पत्रकात नमूद करण्यात आले आहे.
दुष्परिणाम गंभीर – आरोग्यास मोठा धोका
डीजेच्या प्रचंड आवाजामुळे तरुण-तरुणींना, विद्यार्थ्यांना तसेच ज्येष्ठ नागरिकांना गंभीर त्रास होत असल्याचे वैद्यकीय तज्ञांनी स्पष्ट केले आहे. काहींना बहिरेपण, हृदयविकाराचा झटका, निद्रानाश, तर लेझर लाईटमुळे डोळ्यांवर दुष्परिणाम, कायमस्वरूपी दृष्टीदोष अशा गंभीर समस्या उद्भवू लागल्या आहेत. गरोदर महिला, लहान बालकं आणि दीर्घकालीन आजारांनी ग्रस्त रुग्ण या दुष्परिणामांना विशेषतः बळी पडतात.
समाजहितासाठी एकजुटीची गरज
“काही व्यक्तींच्या चुकीमुळे संपूर्ण समाजाला आरोग्यविषयक संकटांचा सामना करावा लागतो. त्यामुळे डीजे व लेझरविरोधी जनजागृतीसाठी आणि या साधनांच्या कायमस्वरूपी हद्दपारीसाठी नागरिकांनी या रॅलीत सामील होणे आवश्यक आहे. हा केवळ एखाद्या संस्थेचा लढा नसून संपूर्ण समाजाच्या आरोग्य व भविष्यासाठीची चळवळ आहे,” असे आवाहन आयएमएच्या पदाधिकाऱ्यांनी केले आहे.
रॅलीला व्यापक प्रतिसादाची अपेक्षा
धुळे शहरातील नागरिकांमध्ये या रॅलीबाबत उत्सुकता असून, विविध शाळा-महाविद्यालयांनी आपल्या विद्यार्थ्यांना यात सहभागी होण्यासाठी तयारी दर्शवली आहे. आरोग्य रक्षण, शांतता व सामाजिक शिस्त प्रस्थापित करण्यासाठी ही रॅली ऐतिहासिक ठरेल, अशी अपेक्षा आयोजकांकडून व्यक्त केली जात आहे.
मुख्य संपादक – गणेश दगा पाटील.
