शिरपूर (प्रतिनिधी): शिरपूर शहरात घडलेल्या मोठ्या वाहनचोरी प्रकरणाचा पर्दाफाश करत शिरपूर शहर पोलीस यांनी आंतरराज्यीय हायवा चोर टोळीवर जोरदार घाव घातला आहे. तब्बल १ कोटी १० लाख रुपये किमतीचे दोन टाटा सिग्ना हायवा डंपर चोरीला गेल्यानंतर अवघ्या काही दिवसांत पोलिसांनी थेट राजस्थान व हरियाणा गाठत चार सराईत गुन्हेगारांना अटक केली.
दिनांक ११ फेब्रुवारीच्या मध्यरात्री शिरपूर शहरातून हे दोन हायवा डंपर चोरीला गेले होते. प्रकरणाचे गांभीर्य ओळखून किशोरकुमार परदेशी यांनी तातडीने विशेष तपास पथके रवाना केली. शिरपूरपासून राजस्थानातील भिलवाडापर्यंतच्या महामार्गांवरील शेकडो सीसीटीव्ही फुटेज, मोबाईल तांत्रिक विश्लेषण व गोपनीय माहितीच्या आधारे आरोपींचा माग काढण्यात आला.
स्थानिक पोलिसांच्या समन्वयाने सापळा रचत हरियाणा व राजस्थान येथे धडक कारवाई करण्यात आली. या कारवाईत चार गुन्हेगारांच्या मुसक्या आवळून चोरीचे दोन्ही हायवा डंपर व गुन्ह्यासाठी वापरलेली कार असा एकूण १ कोटी १० लाखांचा मुद्देमाल हस्तगत करण्यात आला.ही संपूर्ण धाडसी कारवाई श्रीकांत धिवरे यांच्या मार्गदर्शनाखाली यशस्वीरीत्या पार पडली. शिरपूर पोलिसांच्या या कामगिरीमुळे वाहनचोरी करणाऱ्या टोळ्यांना जोरदार इशारा मिळाला असून, नागरिकांमध्ये सुरक्षिततेची भावना अधिक बळकट झाली आहे. शिरपूर पोलिसांच्या या उल्लेखनीय यशाबद्दल सर्वत्र कौतुक होत आहे.
यशस्वी कारवाई पोलीस अधीक्षक श्रीकांत धिवरे, अपर पोलीस अधीक्षक अजय देवरे, उपविभागीय पोलीस अधिकारी सुनील गोसावी यांच्या मार्गदर्शनाखाली पार पडली. निरीक्षक किशोरकुमार परदेशी तसेच शोध पथकातील हवालदार रवींद्र आखडमल, गोविंद कोळी, विनोद आखडमल, आरिफ तडवी, प्रशांत पवार, भटू साळुंके, योगेश दाभाडे, मनोज दाभाडे, मनोज महाजन, सोमा ठाकरे, सचिन वाघ यांनी अथक परिश्रम घेत ही कामगिरी बजावली.
मुख्य संपादक – गणेश दगा पाटील.
